Jizzax, Samarqand va Buxoro viloyatlarida 462 million so‘mdan ortiq qalbaki pullarni tayyorlagan fuqarolar qo‘lga olindi. Bu haqda viloyat Ichki ishlar boshqarmasi axborot xizmati xabar berdi.
Xabarga ko‘ra, Jizzax viloyati Paxtakor tumanida 3-fevral kuni IIO xodimlari qalbaki pullarni muomalaga kiritayotganlarni qo‘lga oldi. Nomaʼlum shaxs tomonidan 4 300 000 so‘m miqdordagi qalbaki pulni Paynet orqali bank plastik kartasiga tushirib olingan. O‘tkazilgan ekspertiza pullarning soxtaligini tasdiqlandi. Surishtiruv davomida ushbu Jizzax viloyati “Havaslik” mahallasi hamda Jizzax shahrining “Mirzo Ulug‘bek” mahallasidan yashovchi ikki nafar shaxs ushlandi. Ulardan 10 dona Paynet cheki, 39 dona bank kvitansiyasi va 1 dona bank plastik kartasi hujjatlashtirib olingan. Ularning ko‘rsatmasi asosida 4 ta Paynet shoxobchasidan 4 yarim million so‘m miqdordagi qalbaki pullar olindi.
Shuningdek, ayblanuvchilardan biri “Mirzo Ulug‘bek” mahallasida joylashgan qurilishi tugallanmagan ko‘p qavatli binoga yashirib qo‘ygan 18 million so‘m miqdordagi qalbaki pullar hujjatlashtirib olindi. Surishtiruv jarayonida gumonlanuvchilardan biri qalbaki pullarni Samarqand viloyati Payariq tumani “Xo‘jaismoil” mahallasida istiqomat qiluvchi shaxsdan sotib olganligini bildirgan. Yaʼni u qalbaki 28 million so‘mni 18 million so‘mga sotib olgan.
Bundan tashqari, IIO xodimlari Samarqand viloyati Payariq tumani “Xo‘jaismoil” mahallasida yashovchi shaxsni qo‘lga olganda u 200 ming so‘mlik qalbaki kupyuralarni 60 ming so‘mdan Buxoro shahri “Piridasgir” mahallasida yashovchi shaxsdan sotib olganini bildirgan. Jizzax viloyati IIB JQBning korrupsiya va iqtisodiy jinoyatlarga qarshi kurashish bo‘limi xodimlari Buxorolik xodimlar bilan birgalikda tezkor tadbirni davom ettirib, Buxoro shahrining “Furqat” mahallasi hududida 30 million so‘mni 100 million so‘m qalbaki pulga almashtirgan shaxsni qo‘lga oldi. Ko‘p o‘tmay soxta pullarni tayyorlashda ishtirok etgan Buxoro shahrining “Furqat” hamda “Murtazoyev” mahallasida yashovchi 3 nafar shaxs ushlandi. Ularning turar joyidan 336 million 400 ming so‘m soxta pul, 4 ta kompyuter jamlanmasi, 5 dona printer, 3 dona qog‘oz kesish moslamasi va 35 dona rangsiz laklar hujjatlashtirib olindi.
Qayd etilishicha, gumonlanuvchilardan umumiy hisobda 462 million 400 ming so‘m qalbaki ashyoviy dalil tariqasida hujjatlashtirib olinib, tarkibida 6 kishi bo‘lgan jinoiy guruh faoliyatiga chek qo‘yildi va ularning barchasi vaqtincha saqlash hibsxonasiga joylashtirildi. Ayni paytda yuqoridagi holatlar yuzasidan tergov harakatlari davom etmoqda.
Izoh (0)