Сурхондарё вилоятида гиёҳванд моддалар савдоси билан шуғулланган тўрт нафар наркосавдогар 12 йилдан 14 йилгача қамалди. Бу ҳақда ЎзА хабар берди.
Хабарга кўра, Термиз туманида яшовчи фуқаро 2021 йил сентябр ойида Денов туманида тожикистонлик шахсдан 2 кг опий моддасини 14 минг долларга сотиб олади ва келгусида уни қайта сотиб, даромад топиш мақсадида уйида сақлайди.
Шундан сўнг 2022 йил июнь ойида у Термиз шаҳри ва туманида яшовчи 2 нафар таниши билан ушбу моддани 40 минг долларга сотган вақтларида ДХХ ходимлари томонидан қўлга олинди. Ҳолат юзасидан қўзғатилган жиноят иши доирасида Термиз шаҳрида яшовчи шахс ҳам мазкур ноқонуний ишга аралашгани аниқланди.
Жиноят ишлари бўйича Термиз шаҳар судининг ҳукмига кўра, ушбу 4 нафар шахс Жиноят Кодексининг 246 ва 273-моддалари билан айбдор деб топилиб, 12 йилдан 14 йилгача бўлган муддатларга озодликдан маҳрум этиш жазоси тайинланди.
Изоҳ (0)