“Human.uz” nashri direktori, jurnalist Xurshid Daliyev tovlamachilikda gumon qilinib, qamoqqa olingan edi. “Daryo” muxbiri Xurshid Daliyev saqlanayotgan hibsxonada bo‘lib, u bilan tergov jarayonlari qanchalik qonuniy bo‘layotgani to‘g‘risida suhbatlashdi.
Nima bo‘lgan edi?
Yanvar oyida “Human.uz” nashri direktori Xurshid Daliyev, bosh muharriri Muslim Mirzajonov va saytning boshqa xodimlari qo‘lga olingandi. DXX organlari tomonidan berilgan maʼlumotga ko‘ra, fuqaro I.A.dan kelib tushgan murojaatga asosan, fuqaro D.X. va boshqalarning Telegram messenjeridagi “Kompromat.uzb”va boshqa kanallar orqali amalga oshirilgan jinoyatlarga aloqadorliklari sababli ularga nisbatan Jinoyat kodeksining 165-moddasi (tovlamachilik) 2-qismi “v” bandi (bir guruh shaxslar tomonidan oldindan til biriktirib sodir etilgan) bilan jinoyat ishi qo‘zg‘atilgan va hozirda dastlabki tergov harakatlari olib borilyapti. Ayni vaqtda jurnalist DXX hibsxonasida tergov qilinmoqda.
“Qiynoq bo‘lmadi”
Xurshid Daliyev “Daryo” muxbiriga sog‘lig‘i meʼyorida ekani, shifokorlar tomonidan yetarlicha ko‘rik o‘tkazilayotganini aytdi.
«Hozir sog‘lig‘im joyida. Hibsxonada zaruriy sharoitlar yaratilgan. Kuniga uch mahal ovqat beriladi. Shifokorlar har kuni ikki mahal xabar oladi”, – dedi jurnalist.
Uning qo‘shimcha qilishicha, tergov jarayoni qonuniy va adolatli kechmoqda.
“Advokat bilan uchrashish imkoni bor. Menga nisbatan hech qanday bosim yoki qiynoq bo‘lmadi. Umuman olganda, sog‘lig‘im, bu yerdagi sharoit va qonuniy huquqlarim borasida shikoyatim yo‘q. Hammasi o‘z o‘rnida taʼminlanmoqda”, — dedi Xurshid Daliyev.
“Daryo” muxbiri Xurshid Daliyev bilan o‘zaro muloqotda unda qiynoq yoki ruhiy bosimlar alomatini ko‘rmadi.
Avvalroq “Human.uz” nashri jurnalistlarining qo‘lga olinishi ortidan Milliy mass-mediani qo‘llab-quvvatlash va rivojlantirish jamoat fondi bayonot berib, ushbu holatdan xavotir bildirgandi. Shuningdek, Axborot va ommaviy kommunikatsiyalar agentligi “Human.uz” veb-sayti bloklanmaganini maʼlum qilgan.
Maʼlumot uchun, Jinoyat kodeksining 165-moddasi (tovlamachilik) 2-qismi “v” bandi – bir guruh shaxslar tomonidan oldindan til biriktirib sodir etilgan bo‘lsa, besh yildan o‘n yilgacha ozodlikdan mahrum qilish bilan jazolanadi.
Izoh (0)