Kiyev Qrimdagi nishonlarga zarba berish uchun Britaniyaning uzoq masofali raketalaridan foydalanishga tayyor. Bu haqda The Times gazetasi Ukraina harbiy doiralaridagi manbalarga tayanib xabar berdi.
Nashr suhbatdoshi Ukraina prezidenti Vladimir Zelenskiyning uzoq masofali raketalar yordamida “bosib olingan hududlardagi” Rossiya harbiy obyektlarini yo‘q qilish haqidagi so‘zlari Qrimga zarbalar berish ehtimolini anglatishini tasdiqladi. Uning so‘zlariga ko‘ra, Kiyev bunday harakatlarga tayyor.
8-fevral kuni Zelenskiyning Londonga eʼlon qilinmagan tashrifi chogʻida Buyuk Britaniya bosh vaziri Rishi Sunak Britaniya Ukrainaga “uzoq masofaga moʻljallangan qurollarni” topshirishga tayyorlanayotganini tasdiqlagandi. Hukumat bu bilan aniq nimani nazarda tutayotganiga izoh bermayapti, biroq avvalroq London uzoq masofali raketalarni Ukrainaga topshirish ehtimolini e’lon qilgan edi.
Britaniyalik harbiy kuzatuvchilarning ma’lumotlariga ko‘ra, gap 240 kilometrgacha masofaga uchadigan, yerdagi nishonlarga zarba berishga moslashtirib bo‘lgan Harpoon kemaga qarshi raketalari haqida ketayotgan bo‘lishi mumkin. Yana bir variant — Storm Shadow havo-havo raketalari bo‘lib, ularning masofasi 560 kilometrga yetadi. The Times gazetasi bilan suhbatlashgan ekspertlarning fikricha, Storm Shadow raketalarining Kiyevga berilishi dargumon, chunki bu Buyuk Britaniyaning Ukrainaga AQSHnikiga qaraganda uzoqroq masofaga mo‘ljallangan qurollarni uzatayotganini anglatadi, bu esa Vashingtonni noqulay ahvolga solib qo‘yadi.
Ukraina rasmiylari Rossiya bilan urush faqatgina rus qo‘shinlari bosib olingan barcha hududlardan, jumladan, 2014-yilda anneksiya qilingan Qrimdan olib chiqib ketilgandan keyingina tugashini bir necha bor taʼkidlagan. Ukraina hukumati vakillari Qrimni qaytarish bo‘yicha ehtimoliy harbiy operatsiya haqida muntazam gapirib keladi.
AQSH Qrimni Ukraina hududi deb biladi. Shu bilan birga, Rossiyaning Ukrainaga keng ko‘lamli bosqinidan so‘ng Vashington Kiyevga yarimoroldagi nishonlarga zarba bera oladigan vositalarni taqdim etishdan bosh tortdi. Ammo yanvar oyida The New York Times gazetasi AQSH prezidenti ma’muriyati bu masala bo‘yicha o‘z pozitsiyasini asta-sekin yumshatib borayotgani haqida xabar berdi.
Izoh (0)