Ukraina razvedkasi Rossiyaning K-555 “Knyaz Pojarskiy” strategik atom suvosti kemasi haqidagi ayrim ma’lumotlarni qo‘lga kiritdi. Bu haqda Deutsche Welle xabar berdi.
Qo‘lga kiritilgan ichki hujjatlarda kemaning texnik xususiyatlari va tashkiliy tafsilotlari aks etgan. Suvosti kemasi o‘tgan hafta oxirida Murmansk viloyatidagi Gadjiyevo shahridagi asosiy bazasiga yetib kelgan. Hujjatlar tarkibida ekipaj uchun jangovar yo‘riqnomalar, kemani jangovar boshqarish sxemasi, muhandislik hujjatlari, bo‘linmalarni germetizatsiya qilish sxemalari, kema jadvali hamda shaxsiy tarkib ro‘yxati mavjud. Ularda jismoniy tayyorgarlik bahosi, lavozimlar va malaka ko‘rsatkichlari ham qayd etilgan.
Razvedka ma’lumotlariga ko‘ra, ushbu hujjatlar nafaqat “Knyaz Pojarskiy” suvosti kemasining o‘ziga xos jihatlarini aniqlash, balki Rossiyaning yadroviy triadasining muhim qismi bo‘lgan “Borey-A” turidagi boshqa raketa tashuvchilarning texnik xususiyatlari va zaif tomonlarini ham baholash imkonini beradi. Kema 16 ta “Bulava” ballistik raketasini uchirish moslamasiga ega bo‘lib, har biri bir nechta yadroviy kallaklar bilan jihozlanishi mumkin.
Suratda suvosti kemasining konstruksiya elementlari, jumladan, ehtimoliy nuqsonlar yoki korroziya izlari tasvirlangan. Ekipajning ayrim a’zolari bo‘yicha jismoniy tayyorgarlik ko‘rsatkichlari past ekani aniqlangan, bu ayrim bo‘linmalarning yetarlicha jangovar tayyorgarlikka ega emasligidan dalolat beradi.
Izoh (0)