Rossiyaning Ukrainaga qarshi urushini boshlagan Vladimir Putinni ukrainaliklar ham, boshqa davlatlar ham kechirmaydi. Bu haqda Ukraina prezidenti Vladimir Zelenskiy Germaniyaning Spiegel nashriga bergan intervyusida ma’lum qildi.
“Ukrainaliklar Putinni kechirmaydi. Dunyoning aksariyat davlatlari esa Rossiyaning amaldagi rahbariyatini anchadan beri hisobdan chiqarishgan. Bu menga Gitlerning intihosini eslatadi: u jahon urushida yutqazganida ham Londonni bombardimon qilishda davom etgan. U ahmoq odam bo‘lmasa ham shunday qilgandi”, — dedi Zelenskiy.
Zelenskiy Ukraina va Rossiya o‘rtasida siyosiy va tarixiy jihatdan katta bo‘shliq borligini ta’kidladi.
“Bu dunyoqarash masalasi. Putinning dunyoqarashi natijasi esa: vayron qilingan hududlar, xalqaro huquq, inson huquqlari, barcha tirik mavjudotlarga e’tibor bermaslik”, — deya ta’kidladi Ukraina rahbari.
Zelenskiyning fikricha, Rossiyaning amaldagi prezidentini to‘xtatib bo‘lmaydi, “chunki Putin och ajdaho: uning ishtahasini qondirish uchun siz unga birin-ketin mamlakatlarni yoki hech bo‘lmaganda ularning bir qismini tortiq qilishingiz kerak”.
Shuningdek, u Rossiyaga qarshi sanksiyalar joriy etishga yoki Ukrainga qurol-yarog‘ yetkazib berishga shoshilmayotgan ayrim davlatlarning siyosatidan hafsalasi pir bo‘lganini aytdi.
“Ruslar sizning chegarangizda paydo bo‘lgach, o‘z xalqingiz hayotini qurbon qilishga majbur bo‘lasiz. Shuning uchun Ukraina bugun qilayotgan ish sizning mamlakatingiz uchun ham foydali”, — dedi Zelenskiy.
Izoh (0)