Janubiy Afrika respublikasida (JAR) elektr uzilishi to‘lqinlari davom etayotgani sababli milliy ofat rejimi e’lon qilindi, dedi mamlakat prezidenti Siril Ramafosa.
“Biz chuqur energetika inqirozi girdobidamiz. Inqiroz asta-sekin rivojlanib, jamiyatning barcha sohalarini qamrab oldi. Uning qishloq xo‘jaligi, kichik biznes, suv infratuzilmasi va transport tarmog‘iga ta’sirini kamaytirish uchun harakat qilishimiz kerak”, — dedi Ramafosa o‘zining parlamentga yillik murojaatida.
Favqulodda holat e’lon qilish hukumatga inqirozga javob berish uchun qo‘shimcha vakolatlar, jumladan, kamroq byurokratik kechiktirishlar bilan favqulodda choralar ko‘rish imkonini beradi.
FT ma’lumotlariga ko‘ra, so‘nggi oylarda Janubiy Afrikadagi iste’molchilar kuniga 10 soatgacha elektrsiz o‘tirishga majbur bo‘lmoqda: davlat energetika monopoliyasi Eskom issiqlik elektr stansiyasi uskunalari eskirgani va mavjud quvvatni saqlash bilan bog‘liq muammolar tufayli shunday choralarni ko‘rgan.
Gazetaning yozishicha, 2022-yilda janubiy afrikaliklar Eskom elektr stansiyalaridagi avariyalar tufayli avvalgi yilga qaraganda ikki barobar ko‘proq elektr uzilishlarini boshdan kechirgan. O‘chirishlar dekabr va yanvar oylarida ham davom etdi, odatda bu vaqtda JARda elektr tarmoqlariga yuklanish past bo‘ladi.
Rasmiylar iqtisodiyot uchun kunlik zararni 57 million dollarga baholadi. Ularning taxminiga ko‘ra, 2023-yilda YIM o‘sishi o‘tgan yilgi 2,5 foizga nisbatan 0,3 foizni tashkil etadi.
Izoh (0)