Киев Қримдаги нишонларга зарба бериш учун Британиянинг узоқ масофали ракеталаридан фойдаланишга тайёр. Бу ҳақда The Times газетаси Украина ҳарбий доираларидаги манбаларга таяниб хабар берди.
Нашр суҳбатдоши Украина президенти Владимир Зеленскийнинг узоқ масофали ракеталар ёрдамида “босиб олинган ҳудудлардаги” Россия ҳарбий объектларини йўқ қилиш ҳақидаги сўзлари Қримга зарбалар бериш эҳтимолини англатишини тасдиқлади. Унинг сўзларига кўра, Киев бундай ҳаракатларга тайёр.
8 февраль куни Зеленскийнинг Лондонга эълон қилинмаган ташрифи чоғида Буюк Британия бош вазири Риши Сунак Британия Украинага “узоқ масофага мўлжалланган қуролларни” топширишга тайёрланаётганини тасдиқлаганди. Ҳукумат бу билан аниқ нимани назарда тутаётганига изоҳ бермаяпти, бироқ аввалроқ Лондон узоқ масофали ракеталарни Украинага топшириш эҳтимолини эълон қилган эди.
Британиялик ҳарбий кузатувчиларнинг маълумотларига кўра, гап 240 километргача масофага учадиган, ердаги нишонларга зарба беришга мослаштириб бўлган Harpoon кемага қарши ракеталари ҳақида кетаётган бўлиши мумкин. Яна бир вариант — Storm Shadow ҳаво ракеталари бўлиб, уларнинг масофаси 560 километрга етади. The Times газетаси билан суҳбатлашган экспертларнинг фикрича, Storm Shadow ракеталарининг Киевга берилиши даргумон, чунки бу Буюк Британиянинг Украинага АҚШникига қараганда узоқроқ масофага мўлжалланган қуролларни узатаётганини англатади, бу эса Вашингтонни ноқулай аҳволга солиб қўяди.
Украина расмийлари Россия билан уруш фақатгина рус қўшинлари босиб олинган барча ҳудудлардан, жумладан, 2014 йилда аннекция қилинган Қримдан олиб чиқиб кетилгандан кейингина тугашини бир неча бор таъкидлаган. Украина ҳукумати вакиллари Қримни қайтариш бўйича эҳтимолий ҳарбий операция ҳақида мунтазам гапириб келади.
АҚШ Қримни Украина ҳудуди деб билади. Шу билан бирга, Россиянинг Украинага кенг кўламли босқинидан сўнг Вашингтон Киевга яриморолдаги нишонларга зарба бера оладиган воситаларни тақдим этишдан бош тортди. Аммо январь ойида The New York Times газетаси АҚШ президенти маъмурияти бу масала бўйича ўз позициясини аста-секин юмшатиб бораётгани ҳақида хабар берди.
Изоҳ (0)