SpaceX asoschisi Ilon Mask odamlar 10 yil ichida Marsga qo‘na olishi haqida ma’lum qilgandi. Fizika-matematika fanlari doktori, Rossiya Fanlar akademiyasi Koinot tadqiqotlari instituti bosh ilmiy xodimi Sergey Pulinets bu fikrga qarshi chiqdi.
Olimning so‘zlariga ko‘ra, mazkur prognoz mutlaqo real emas.
“Marsga parvoz ancha uzoq va taxminan ikki yil davom etadi. Hali yuqori yuk va radiatsiya ta’sirida tirik organizm xavfsizligini ta’minlash imkoni yo‘q”, — dedi u.
Pulinets Marsga ertaroq parvoz qilish uchun bajarilishi kerak bo‘lgan ikkita omil haqida gapirdi.
“Agar biz yadro buksirini yaratishga muvaffaq bo‘lsak, bu haqda gapirishimiz mumkin bo‘ladi, uning yordamida Marsga parvoz vaqtini qisqartirish mumkin. Hozirda uni ishlab chiqarish ustida izlanish olib borilmoqda. Ikkinchidan, nurlanishdan odamlarni himoya qilishni ta’minlash kerak. Bu ikkita eng muhim omil, navigatsiya, qo‘nish imkoniyati va hokazolar haqida gapirmasa ham bo‘ladi”, — deydi u.
Ekspert insoniyat o‘z oldiga shunday vazifalarni qo‘yishi kerakligini ta’kidlaydi.
“Texnologiya juda tez sur’atlar bilan rivojlanmoqda. Tan olaman, qandaydir yutuq bo‘lishi mumkin va keyin Ilon Mask haq bo‘ladi. Umuman olganda, u shuhratparast odam va uning barcha gaplari ro‘yobga chiqmasa ham, u juda ko‘p muvaffaqiyatlarga erishadi”, — deya qo‘shimcha qiladi mutaxassis.
Izoh (0)