SpaceX асосчиси Илон Маск одамлар 10 йил ичида Марсга қўна олиши ҳақида маълум қилганди. Физика-математика фанлари доктори, Россия Фанлар академияси Коинот тадқиқотлари институти бош илмий ходими Сергей Пулинец бу фикрга қарши чиқди.
Олимнинг сўзларига кўра, мазкур прогноз мутлақо реал эмас.
“Марсга парвоз анча узоқ ва тахминан икки йил давом этади. Ҳали юқори юк ва радиация таъсирида тирик организм хавфсизлигини таъминлаш имкони йўқ”, — деди у.
Пулинец Марсга эртароқ парвоз қилиш учун бажарилиши керак бўлган иккита омил ҳақида гапирди.
“Агар биз ядро буксирини яратишга муваффақ бўлсак, бу ҳақда гапиришимиз мумкин бўлади, унинг ёрдамида Марсга парвоз вақтини қисқартириш мумкин. Ҳозирда уни ишлаб чиқариш устида изланиш олиб борилмоқда. Иккинчидан, нурланишдан одамларни ҳимоя қилишни таъминлаш керак. Бу иккита энг муҳим омил, навигация, қўниш имконияти ва ҳоказолар ҳақида гапирмаса ҳам бўлади”, — дейди у.
Эксперт инсоният ўз олдига шундай вазифаларни қўйиши кераклигини таъкидлайди.
“Технология жуда тез суръатлар билан ривожланмоқда. Тан оламан, қандайдир ютуқ бўлиши мумкин ва кейин Илон Маск ҳақ бўлади. Умуман олганда, у шуҳратпараст одам ва унинг барча гаплари рўёбга чиқмаса ҳам, у жуда кўп муваффақиятларга эришади”, — дея қўшимча қилади мутахассис.
Изоҳ (0)