Quddusda mashina avtobus bekatiga kirib ketishi oqibatida ikki kishi halok bo‘ldi. Bu haqda The Jerusalem Post xabar berdi.
Ma’lum qilinishicha, Isaviyya mahallasida yashovchi 31 yoshli erkak mashinasini Ramot kvartaliga kiraverishdagi avtobus bekatiga urib yuborgan. Oqibatda olti yoshli bola va 20 yoshli yigit halok bo‘lgan, 5 kishi tan jarohati olgan.
Isroil bosh vaziri Binyamin Netanyaxu voqeani terakt deb baholagan, mashina haydovchisining uyini muhrlab, buzib tashlashni buyurgan. U halok bo‘lganlarning oila a’zolariga hamdardlik bildirgan.
“Men xavfsizlik kuchlarini kuchaytirish, hibsga olish va terrorchining uyini muhrlash va buzish uchun zudlik bilan choralar ko‘rish bo‘yicha ko‘rsatma berdim. Terrorizmga javobimiz bor kuchimiz bilan zarba berish va mamlakat ustidan nazoratni kuchaytirishdir”, — degan Netanyaxu.
Xamas matbuot kotibi Hazem Qossim Ramotdagi hujumga munosabat bildirgan.
“Qahramonlik operasiyasi Falastin xalqiga qarshi ishg‘olning barcha jinoyatlariga tabiiy javob hisoblanadi”, — deyiladi bayonotda.
Izoh (0)