O‘tgan hafta davomida ya’ni 30-yanvar—5-fevral kunlari tovar-xom ashyo birjasining barcha savdo platformalarida 2,46 trln so‘mlik tovarlar sotilgan bo‘lib, bu avvalgi haftaga nisbatan 6,6 foizga ko‘pdir. Bu haqda birja matbuot xizmati xabar berdi.
Bunda sotuvlarning
- 93,5 foizi — birja savdolari;
- 0,1 foizi — ko‘rgazma-yarmarka savdolari;
- 6,1 foizi — elektron davlat xaridlari;
- 0,3 foizi — avtoraqamlarning onlayn-auksioniga to‘g‘ri keldi.
Kichik biznes va xususiy tadbirkorlik subyektlari ishtirokida tuzilgan bitimlarning umumiy hajmi 638 mlrd so‘mni tashkil qildi. Davlat xaridlari tizimlarida o‘tkazilgan elektron savdolar natijasida budjet va korporativ buyurtmachilarining qariyb 41,5 mlrd so‘mlik mablag‘lari tejaldi.
Ko‘rib chiqilayotgan davr mobaynida onlayn auksion orqali 2 128 ta avtoraqamlar sotildi, sotilgan davlat raqam belgilarining umumiy summasi 7,7 mlrd so‘mni tashkil qildi.
Raqobatli savdolar natijasida bitimlarning
- 3 foizi — birinchi toifadagi avtoraqamlarga;
- 6,8 foizi — ikkinchi toifadagi avtoraqamlarga;
- 10,9 foizi — uchinchi toifadagi avtoraqamlarga;
- 14 foizi — to‘rtinchi toifadagi avtoraqamlarga;
- 22 foizi — beshinchi toifadagi avtoraqamlarga;
- 43,4 foizi — oltinchi toifa avtoraqamlarga tegishlidir.
Birja savdolari
Ko‘rib chiqilayotgan davrda ochiq birja savdolari orqali jami 2,3 trln so‘mlik tovar resurslari sotildi, shu jumladan:
Suyultirilgan gaz
O‘tgan haftada birja savdolariga 7 048 tonna suyultirilgan gaz qo‘yildi va uning 6 294 tonnasi ya’ni 89,3 foiz qismi sotildi. O‘tkazilgan savdolarda har kuni o‘rtacha 236 ta xaridor ishtirok etdi.
Ko‘rib chiqilayotgan davrda suyultirilgan gaz bo‘yicha shakllangan kunlik o‘rtacha narxlar mahsulotning bir tonnasi uchun 6,2 mln so‘mdan 5,8 mln so‘mgacha pasaygan.
O‘tkazilgan birja savdolari natijasida suyultirilgan gaz bo‘yicha shakllangan o‘rtacha haftalik narxi mahsulotni bir tonnasi uchun 5,8 mln so‘mni tashkil etdi.
Shakar
Birja savdolariga 13 701 tonna shakar qo‘yildi va uning 13 351 tonnasi ya’ni 97,4 foiz qismi sotildi. O‘tkazilgan savdolarda har kuni o‘rtacha 338 ta xaridor ishtirok etdi.
Ko‘rib chiqilayotgan davrda shakarning barcha kategoriyasi bo‘yicha shakllangan kunlik o‘rtacha narxlar mahsulotning bir tonnasi uchun 10,3 mln so‘mdan 10,1 mln so‘mgacha pasaygan.
O‘tkazilgan birja savdolari natijasida mahalliy shakarning TS-2 — kategoriyasi bo‘yicha shakllangan o‘rtacha haftalik narxi mahsulotni bir tonnasi uchun 10,4 mln so‘mni tashkil etdi.
Polietilen
O‘tgan hafta mobaynida birja savdolariga 3 375 tonna polietilen qo‘yildi va ulardan barcha hajmi sotildi. Polietilenning o‘rtacha kunlik sotuv hajmlari 675 tonnani tashkil qildi.
Ko‘rib chiqilayotgan davrda polietilenning barcha markalari bo‘yicha shakllangan kunlik o‘rtacha narxlar mahsulotning bir tonnasi uchun 17,8 mln so‘mdan 16,7 mln so‘mgacha pasaydi. O‘tkazilgan savdolarda har kuni o‘rtacha 66 xaridor ishtirok etdi.
Izoh (0)