Xitoy, Koreya va Qozog‘iston: O‘zbekistonga eng ko‘p “inomarka”lar qayerdan olib kelingani ma’lum bo‘ldi

2022-yilda O‘zbekiston 34 ta xorijiy davlatdan yengil avtomobillar import qilgan. Bu haqda Davlat statistika qo‘mitasi xabar bermoqda.

Ma’lumotlarga ko‘ra, yanvar—dekabr oylarida 33 ta davlatdan yengil avtomobillar olib kelingan.

12 oyda O‘zbekiston yengil avtomobillarni eng ko‘p Xitoydan import qilgan — 11 159 ta. Birgina dekabr oyida mamlakatdan 1088 ta avtomobil olib kelingan. Yanvar—noyabr oylarida bu ko‘rsatkich 10 071 taga teng bo‘lgan.

O‘zbekiston yil boshidan beri eng ko‘p avtomobil import qilgan davlatlar ro‘yxatida Koreya ikkinchi o‘rinda joylashgan. 12 oy mobaynida mamlakatdan 9 414 ta mashina olib kelingan. Dekabr oyining o‘zida 883 ta avtomobil import qilingan.

Uchinchi o‘rinda 7 208 ta avtomobil import qilingan Qozog‘iston turibdi. Yanvar—noyabr oylarida mamlakatdan 6 395 ta avtomobil import qilingan. Dekabr oyida esa bu ko‘rsatkich oshgan — 813 ta avtomobil.

2022-yil davomida O‘zbekiston avtomobil import qilgan davlatlar ro‘yxatida Rossiya to‘rtinchi o‘rinda — 1 499 ta. Dekabr oyida mamlakatdan umuman mashina olib kelinmagan.

Beshinchi o‘rinda esa 555 ta avtomobil bilan AQSH joylashgan. O‘tgan oyda mamlakatdan 64 ta yengil avtomobil olib kelingan.

O‘zbekiston avtomobil import qilgan davlat ro‘yxatidagi keyingi o‘rinlarda Yaponiya (157 ta), BAA (128 ta),  va Germaniya (125 ta) joylashgan.