Amazon, Meta, Alphabet va Microsoft xodimlarni qisqartirish uchun 10 mlrd dollardan ko‘proq mablag‘ sarflaydi

Amazon, Meta (Facebook), Alphabet (Google) va Microsoft ommaviy ishdan bo‘shatish va boshqa tejamkorlik choralari uchun 10 milliard dollardan ortiq mablag‘ sarflaydi. Bu haqda Financial Times xabar berdi.

Texnologik sektorda eng katta ish o‘rinlarini qisqartirayotgan AQSH kompaniyalari o‘zlarining qayta qurish harakatlari bilan bog‘liq yuqori xarajatlarni oshkor qildi. Ushbu to‘rtta korporatsiya umumiy 50 mingta ish o‘rinlarini qisqartirishini e’lon qildi.

Ma’lumotlarga ko‘ra, kompaniyalarning dastlabki xarajatlari, jumladan, ishdan bo‘shatish nafaqalari ko‘p bo‘lishiga qaramay, ko‘rilgan choralar investorlarni rag‘batlantirmoqda.

Qisqartirish haqida rasmiy e’lon qilinganidan beri kompaniyalar birgalikda bozor kapitallashuvini 800 milliard dollardan ko‘proqqa oshirdi.

Noyabr oyida ish joylarini qisqartirish haqida e’lon qilgandan so‘ng, Meta’ning qiymati deyarli ikki baravar oshdi.

Ta’kidlanishicha, Apple o‘zining uch yarim yil ichida birinchi marta choraklik daromadi kamaygani haqida xabar berganiga qaramay, ish joylarini qisqartirish yoki xarajatlarni kamaytirish dasturini e’lon qilmagan yagona yirik texnologiya kompaniyasi bo‘lib qolmoqda.