Суюлтирилган газ ва шакар нархи пасайди: Ўзбекистон биржасида ўтган ҳафтадаги вазият қандай бўлди?

Ўтган ҳафта давомида яъни 30 январь—5 февраль кунлари товар-хом ашё биржасининг барча савдо платформаларида 2,46 трлн сўмлик товарлар сотилган бўлиб, бу аввалги ҳафтага нисбатан 6,6 фоизга кўпдир. Бу ҳақда биржа матбуот хизмати хабар берди.

Бунда сотувларнинг 

• 93,5 фоизи — биржа савдолари; 
• 0,1 фоизи — кўргазма-ярмарка савдолари; 
• 6,1 фоизи — электрон давлат харидлари;
•  0,3 фоизи — авторақамларнинг онлайн-аукционига тўғри келди.

Кичик бизнес ва хусусий тадбиркорлик субъектлари иштирокида тузилган битимларнинг умумий ҳажми 638 млрд сўмни ташкил қилди. Давлат харидлари тизимларида ўтказилган электрон савдолар натижасида бюджет ва корпоратив буюртмачиларининг қарийб 41,5 млрд сўмлик маблағлари тежалди.

Кўриб чиқилаётган давр мобайнида онлайн аукцион орқали 2 128 та авторақамлар сотилди, сотилган давлат рақам белгиларининг умумий суммаси 7,7 млрд сўмни ташкил қилди. 

Рақобатли савдолар натижасида битимларнинг 

• 3 фоизи — биринчи тоифадаги авторақамларга; 
• 6,8 фоизи — иккинчи тоифадаги авторақамларга; 
• 10,9 фоизи — учинчи тоифадаги авторақамларга; 
• 14 фоизи — тўртинчи тоифадаги авторақамларга; 
• 22 фоизи — бешинчи тоифадаги авторақамларга; 
• 43,4 фоизи — олтинчи тоифа авторақамларга тегишлидир.

Биржа савдолари

Кўриб чиқилаётган даврда очиқ биржа савдолари орқали жами 2,3 трлн сўмлик товар ресурслари сотилди, шу жумладан:

Суюлтирилган газ

Ўтган ҳафтада биржа савдоларига 7 048 тонна суюлтирилган газ қўйилди ва унинг 6 294 тоннаси яъни 89,3 фоиз қисми сотилди. Ўтказилган савдоларда ҳар куни ўртача 236 та харидор иштирок этди.

Кўриб чиқилаётган даврда суюлтирилган газ бўйича шаклланган кунлик ўртача нархлар маҳсулотнинг бир тоннаси учун 6,2 млн сўмдан 5,8 млн сўмгача пасайган.

Ўтказилган биржа савдолари натижасида суюлтирилган газ бўйича шаклланган ўртача ҳафталик нархи маҳсулотни бир тоннаси учун 5,8 млн сўмни ташкил этди.

Шакар

Биржа савдоларига 13 701 тонна шакар қўйилди ва унинг 13 351 тоннаси яъни 97,4 фоиз қисми сотилди. Ўтказилган савдоларда ҳар куни ўртача 338 та харидор иштирок этди.

Кўриб чиқилаётган даврда шакарнинг барча категорияси бўйича шаклланган кунлик ўртача нархлар маҳсулотнинг бир тоннаси учун 10,3 млн сўмдан 10,1 млн сўмгача пасайган.

Ўтказилган биржа савдолари натижасида маҳаллий шакарнинг Ц-2 — категорияси бўйича шаклланган ўртача ҳафталик нархи маҳсулотни бир тоннаси учун 10,4 млн сўмни ташкил этди.

Полиэтилен

Ўтган ҳафта мобайнида биржа савдоларига 3 375 тонна полиэтилен қўйилди ва улардан барча ҳажми сотилди. Полиэтиленнинг ўртача кунлик сотув ҳажмлари 675 тоннани ташкил қилди.

Кўриб чиқилаётган даврда полиэтиленнинг барча маркалари бўйича шаклланган кунлик ўртача нархлар маҳсулотнинг бир тоннаси учун 17,8 млн сўмдан 16,7 млн сўмгача пасайди. Ўтказилган савдоларда ҳар куни ўртача 66 харидор иштирок этди.