Эрон олий раҳнамоси Оятуллоҳ Али Хоманаий ўн минглаб маҳбусларни, жумладан, намойиш иштирокчиларини афв этди. Бу ҳақда IRNA хабар берди.
Маълум қилинишича, амнистия Ислом инқилоби ғалабасининг 44 йиллиги ва Ражаб ойи шарафига ўтказилган.
“Хоманаий суд ҳокимияти раҳбари Ғулом-Ҳусайн Моҳсени-Эжеининг мамлакатдаги сўнгги воқеалар жараёнида ҳибсга олинган ўн минглаб айбланувчиларни афв этиш ёки жазо муддатини қисқартириш таклифига рози бўлди”, — дейилади хабарда.
Қайд этилишича, хорижликлар фойдасига жосуслик қилганликда айбланган, қотиллик содир этган ёки жамоат биноларини вайрон қилиш ва уларга ўт қўйишда иштирок этган шахслар амнистияга тушмайди.
2022 йил сентябрь ойи ўрталаридан бери ҳижобни нотўғри ўрагани учун полиция томонидан ҳибсга олинган 22 ёшли Маҳса Аминий ўлими ортидан Эронда оммавий тартибсизликлар бошланганди. Аҳоли қизнинг ўлимида полицияни айблаган. Мамлакатда бир қанча намойишчи қатл қилинган.
Мавзуга доир:
Изоҳ (0)