Britaniyaning Times Travel nashri Wild Frontiers turizm kompaniyasi tomonidan tavsiya etilgan 2023-yilda yolg‘iz sayohat qilish uchun eng yaxshi mamlakatlar ro‘yxatini e’lon qildi. Ular orasida O‘zbekiston ham bor.
Nashr O‘zbekistonni Buyuk ipak yo‘lida joylashgan o‘ziga xos mamlakat deb atadi va ushbu qadimiy yo‘l bo‘yida joylashgan Samarqand, Buxoro, Xiva, Toshkent shaharlarini tuyalar karvonini eslatuvchi manzilgohlar sifatida sanab o‘tdi.
“Bundan tashqari, siz tog‘larda vaqt o‘tkazasiz, kichik oilaviy mehmonxonada bo‘lib, chekka qishloqlarda sayr qilasiz va bu jarayonda shahar hayotidan uzoqda an’anaviy turmush tarzini o‘rganasiz”, — deyiladi ta’rifda.
Ro‘yxatda, shuningdek, Italiya, Yaponiya, Gretsiya, Fransiya, Misr va yana ko‘plab mamlakatlar sanab o‘tilgan.
Avvalroq Buyuk Britaniyaning IlmFeed nashri O‘zbekistonga qilingan safardan taassurotlari bilan bo‘lishgandi. “O‘zbekistonga tashrif buyurish kerakmi?” deb nomlangan tred ostida mamlakatning shaharlari va odamlaridan tortib, tarixi va dinigacha bo‘lgan jihatlariga alohida to‘xtalib o‘tilgan.
Izoh (0)