Eron Oliy sudi reper Saman Yasinning mamlakatdagi aksilhukumat namoyishlarini qo‘llab-quvvatlagani uchun o‘lim jazosi ustidan yozgan apellyatsiya shikoyatini qabul qildi. Bu haqda Al Jazeera xabar berdi.
Saman Yasin taniqli kurd sana’tkori va reperi bo‘lib, Erondagi noroziliklar fonida hukumat rejimini ochiq tanqid qilgan. U o‘zining ijtimoiy tarmoqlarida namoyishchilarni qo‘llab-quvvatlab postlar qoldirgan va mamlakatdagi voqealar haqida bir necha qo‘shiqlar yozgan.
Eron rasmiylari uni hukumatga qarshi namoyishlar chog‘ida xavfsizlik xodimlariga suiqasd uyushtirish, chiqindi qutisiga o‘t qo‘yish va havoga uch marta o‘q uzishda ayblagan. Uning o‘zi esa barcha ayblovlarni rad etgan. Dastlab sud Saman Yasin va yana bir namoyishchining arizalarini qabul qilganini aytgan. Biroq, Mizan sud axborot agentligi qaror faqat Yasin foydasiga bo‘lganini xabar qilgan.
“Eron Oliy sudining jamoatchilik bilan aloqalari xabarga tuzatish kiritdi: Muhammad Kobadluning apellyatsiyasi qabul qilinmadi, Saman Yasinning shikoyati esa Oliy sud tomonidan qabul qilindi”, deyiladi agentlik xabarida.
Kobadlun namoyishlar chog‘ida politsiyachini o‘ldirish va mashinasi bilan besh kishini yaralaganlikda ayblanmoqda.
Mavzuga doir:
Izoh (0)