Hindistonda voyaga yetmagan qizlarga uylanishda ayblanib, 2 mingdan ortiq erkak hibsga olindi
Hindistonning Assam shtatida politsiya voyaga yetmagan qizlarga uylangan 2000 dan ortiq erkakni hibsga oldi, deb xabar bermoqda NDTV politsiya va rasmiylarga tayanib.
2-fevral kuni bosh vazir Himanta Bisva Sarma tomonidan bolalar nikohiga qarshi kurash kampaniyasi e’lon qilingandi. U Twitter’da mahalliy hokimiyat shtatdagi ushbu muammoga barham berish niyatida ekanini yozdi. Vazir voyaga yetmagan qizlar bilan oila qurishning o‘zini “kechirilmas va og‘ir jinoyat” deb atadi.
“Ikki kun ichida 2200 dan ortiq erkak hibsga olindi”, — dedi vazir. O‘z navbatida, shtat politsiyasi rahbari Gyanendra Pratap Singx jurnalistlarga huquq-tartibot idoralari tomonidan voyaga yetmaganlar bilan nikoh qurish bo‘yicha to‘rt mingdan ortiq holat qayd etilganini, ularda sakkiz mingga yaqin ayblanuvchilar borligini aytdi.
Hindistonning Oila kodeksiga ko‘ra, mamlakatda ayollar uchun 18 yoshdan, erkaklar uchun 21 yoshdan boshlab nikohga ruxsat beriladi. Shuningdek, Hindiston parlamentida ayollarning nikoh yoshini 18 yoshdan 21 yoshgacha ko‘tarish to‘g‘risidagi qonun loyihasi ko‘rib chiqilmoqda. Hindiston ayollar va bolalar taraqqiyoti vaziri Smriti Iranining aytishicha, bu tashabbus qizlarga o‘qishni yakunlash va iqtisodiy mustaqillikka erishish, shuningdek, jismoniy va ruhiy kamolotga yetisg imkonini beradi.
