Toshkent viloyatining Bo‘ka tumani “Jagʻabayli” mahalla fuqarolar yigʻini hududida mini GES quriladi.
Viloyat hokimligi matbuot xizmatining ma’lum qilishicha, bu borada Zoir Mirzayevga Boʻka tumani hokimi Nizomiddin Abbosov, loyiha mutaxassislari Doniyor Botirov hamda Rahmat Erkaboyev atroflicha maʼlumot berdi.
Qayd etilicha, mazkur mikro gidroelektrostansiya qurilishi moʻljallangan hududdan ikkita kanal oʻtgan boʻlib, olinishi koʻzda tutilayotgan qoʻshimcha 100 kVt elektr energiyasi bilan olti yuzga yaqin xonadonni toʻliq taʼminlash rejalashtirilmoqda.
Bu kabi mini gidroelektrostansiyalar suv resurslaridan, jumladan, toʻgʻon yoki sugʻorish kanallaridan olinadigan ikkilamchi suvdan samarali foydalanishni taʼminlaydi, shuningdek, suv sathi kam boʻlgan vaqtlarda ham ishlaydi.
Taqdimotda aholiga qoʻshimcha imkoniyat yaratish maqsadida bu kabi loyihalarni elektr energiya quvvati past boʻlgan olis hududlarda ham joriy etish lozimligi taʼkidlandi.
Viloyat hokimi mazkur loyiha boʻyicha bosqichma-bosqich amalga oshiriladigan ishlar, eng birinchi qadamlar nimalardan iborat boʻlishi lozimligi yuzasidan oʻz fikr va mulohazalarini bayon etdi hamda tuman hokimi va mutasaddilarga zarur koʻrsatmalar berdi.
Izoh (0)