Andijonda 80-yillardan buyon ishlashdan to‘xtab qolgan gidroelektr stansiya tiklanishi kutilmoqda 

Andijon viloyati hokimi elektr energiyasi masalasi boʻyicha olimlar ishtirokida faoliyat boshladi, deb xabar bermoqda viloyat hokimligi matbuot xizmati.

Qayd etilishicha, Shuhrat Abdurahmonov prezident belgilab bergan vazifalarga asosan gidroelektr stansiyalari loyihalarini ishga tushirish boʻyicha harakatlarni olib bormoqda. Jumladan, 5-fevral kuni viloyat hokimi Izboskan tumanida 1950-yillarda qurilgan va 80-yillardan buyon ishlashdan toʻxtab qolgan stansiyani koʻzdan kechirgan.

Stansiya yaqinidagi daryodan 90 metr kub miqdorda suv oqib oʻtadi. Buning yordamida stansiyadan 10 megavatt elektr energiyasi olish mumkin. Yangi loyihalar asosida mazkur stansiya faoliyatini tiklash koʻrib chiqilmoqda. Olimlar va yetuk mutaxassislar ishtirokida muhokama yuritilib, ularning takliflari va tadbirkorlarning loyihalari bilan tanishildi.

Viloyat rahbari bu borada respublika rahbariyatiga maʼlumot berib oʻtdi hamda rejalarni bu yildan qoldirmasdan amalga oshirish zarurligini ilgari surmoqda.

Shuhrat Abdurahmonov Marhamat tumani “Oqbosh” MFY hududidagi sobiq stansiyani ham koʻzdan kechirgan.