Toshkent shahrida bola o‘g‘rilari paydo bo‘lgani haqidagi xabar ijtimoiy tarmoqlarda tarqalib, shov-shuvlarga sabab bo‘ldi. Poytaxt Ichki ishlar bosh boshqarmasi bu ma’lumotni rad etib, voqea tafsilotlarini keltirib o‘tgandi.
Keyinchalik boshqarma axborot xizmati hodisa ishtirokchilari — Shayxontohur tumanidagi 113-sonli maktabning 4 nafar 11-sinf o‘quvchisidan intervyu oldi. Ma’lum bo‘lishicha, F.N. boshqaruvidagi Gentra’ga G.B. va S.N. yerdagi muz bo‘lagini tepgan. Shundan so‘ng yigitlar muz bo‘lagini tepgan bolalarni “ichki ishlarga olib boramiz” deb ularni og‘zaki qo‘rqitgan. Bolalar boshqa bunday qilmasligini aytib, uyiga ketgan.
“Bu videoni ko‘rgandan keyin men ham hamma o‘ylagan narsani o‘yladim. Bundan barcha ota-onaning qoni qaynaydi. Keyin mahalla noziriga chiqib, voqea ishtirokchilarini topishni iltimos qildim. O‘sha kunning o‘zidayoq hammasini topishdi. Aslida o‘g‘lim va uning sinfdoshi maktabdan qaytayotganda qor tepib kelishayotgan ekan. Shu paytda bolalarning mashinasiga qor sachragan. Mashinadagilar ham hali yosh bola ekan. To‘xtab bolalarni mashinagacha sudragani ularning xatosi bo‘lgan”, — deydi mashinaga muz tepgan bolaning otasi.
“Men 1-smenada o‘qiyman. 12:15 da darsim tugagach, bolalar bilan ko‘chaga chiqdik. O‘rtog‘im akasidan mashina olgan ekan. Biz mashinaga o‘tirib, ozgina aylandik. Soat 17:00 ga yaqin men rulga o‘tirishni so‘radim. Keyin unchalik ko‘p masofa yurmasdan oldimizda ikki nafar yosh bola o‘tdi va muz bo‘lagini tepdi. Bolalarga boshqa bunday qilmasligini uqtirish uchun ozgina qo‘rqitib qo‘ymoqchi bo‘ldik. Shundan so‘ng uyiga jo‘natdik, o‘zimiz ham ketdik. Bu yerda maqsad bola o‘g‘rilash emasdi”, — deydi 11-sinf o‘quvchilaridan biri.
“Aholimiz ham bu norasmiy xabarlarni tarqatayotganlarga ishonmasligi kerak. Chunki agar bu haqiqatan shunday bo‘lsa, rasmiy manbalarda e’lon qilingan bo‘lardi. Bu noto‘g‘ri xabarlar. Shu sababli bunday xabarlarga ishonmaslikni so‘rab qolardim”, — deydi mahalla raisi.
Ma’lum bo‘lishicha, 11-sinf o‘quvchilari boshqaruvida Gentra bir kunga ijaraga olingan. Ularga mashinani haydovchilik guvohnomasi bor yigit olib bergan. Uning nomiga mashina rasmiylashtirilgach, avtomobilni maktab o‘quvchilariga bergan. Shundan so‘ng yigit o‘z uyiga ketgan. U qilgan ishidan afsusda ekanini bildirgan.
Shayxontohur tumani ichki ishlar organi faoliyatini muvofiqlashtirish bo‘limi katta inspektori Murod Qudratovning ta’kidlashicha, voqea ishtirokchilarining ota-onalari bilan suhbat o‘tkazilgan va Ma’muriy javobgarlik to‘g‘risidagi kodeksning 47-moddasi (Bolalarni tarbiyalash va ularga ta’lim berish borasidagi majburiyatlarni bajarmaslik) asosida bayonnoma rasmiylashtirilgan.
Izoh (0)