BAA O‘zbekistonda ayollarni kasbga o‘rgatish, ularning bandligini ta’minlash borasidagi ishlarni e’tirof etdi

Oliy Majlis Senati raisi Tanzila Norboyeva BAAga rasmiy tashrif doirasida ushbu davlatning Oilani rivojlantirish jamg‘armasi oliy raisi Fatima bint Mubarak bilan uchrashdi.

Parlament yuqori palatasi maʼlumotiga ko‘ra, muloqot chog‘ida Fatima bint Mubarak, so‘nggi yillarda O‘zbekistonda gender tenglik, xotin-qizlarning jamiyatdagi o‘rnini kuchaytirish masalalarida erishilgan ijobiy yutuqlarni yuqori baholab, ushbu yo‘nalishda ikki mamlakat o‘rtasida amaliy hamkorlikni kuchaytirish taklifini qo‘llab-quvvatlashini bildirdi.

Uchrashuv davomida amirliklar tarafi O‘zbekistonda ayollarni kasbga o‘rgatish, xususan, nafaqat kasanachilik, tekstil sanoati, balki axborot texnologiyalari sohalarida ham ayollarning salohiyatini oshirishga davlat darajasida alohida eʼtibor berilayotgani, shuningdek, qishloq hududlarida ayollar bandligini taʼminlash borasidagi ishlarni eʼtirof etdi.

Bundan tashqari, tomonlar xotin-qizlarning huquq va manfaatlarini himoya qilish, ularning jamiyatdagi rolini oshirish va oila institutini har tomonlama mustahkamlash masalalarini muhokama qildi.

Mazkur yo‘nalishda O‘zbekiston va BAAda olib borilayotgan islohotlar, xotin-qizlarning davlat rivojidagi hissasi, ushbu yo‘nalishda o‘zaro manfaatli hamkorlik va tajriba almashish kabi masalalarga eʼtibor qaratildi.

Shuningdek, BAAga kelib turli sabablar tufayli og‘ir vaziyatga tushib qolayotgan o‘zbek ayollari borasida ham o‘zaro fikr almashilib,  bunday ayollarga har tomonlama ko‘mak berish masalasi ham muhokama qilindi.

Uchrashuv yakunida ayollar imkoniyatlarini kengaytirish sohasida hamkorlikni yo‘lga qo‘yish, O‘zbekiston va BAAning yetakchi oliy taʼlim muassasalarida talaba qizlar uchun almashinuv dasturlarini ishlab chiqish, shuningdek, ikki mamlakat tadbirkor ayollari forumini o‘tkazish yuzasidan dastlabki kelishuvlarga erishildi.