Avval xabar berilganidek, kuz-qish mavsumida respublikamiz aholisi va sanoat obyektlarini tabiiy gaz va yoqilgʻi mahsulotlari bilan uzluksiz taʼminlash hamda 2023-yilda tabiiy gaz qazib chiqarish reja-koʻrsatkichlarini bajarilishini taʼminlashga qaratilgan geologik-texnik chora-tadbirlar ijrosi “Oʻzbekneftgaz” AJ Boshqaruv raisi Mehriddin Abdullayev boshchiligida doimiy nazorat qilib borilmoqda.
.jpg)
Boshqaruv raisi boshchiligidagi “Ishchi guruh” tomonidan navbatdagi nazorat tadbirlari Shoʻrtan neft va gaz qazib chiqarish boshqarmasi konlarida olib borildi.
Tashrif kun tartibiga koʻra, dastlab “Shoʻrtan” konidagi 352, 362, 348, 361 va 393-sonli ishlatish quduqlarining faoliyati bilan tanishildi. Burgʻilash maydonlarida pudratchi tashkilot hamda “Shoʻrtan” koniga biriktirilgan masʼullar ishtirokida rejada belgilangan koʻrsatkichlarining bajarilish holati oʻrganildi. Mavjud muammolar boʻyicha fikr almashinib, masʼullarga ularni bartaraf qilish boʻyicha koʻrsatmalar berildi.
Ayni paytda Shoʻrtan hududida uglevodorodlar zaxiralarini oshirish tadbirlari doirasida “Shoʻrtan” (terrigen) konidagi 1-sonli va “Niyoz” maydonidagi 3-sonli izlov-qidiruv quduqlari burgʻilanmoqda.
Boshqaruv raisi ushbu quduqlardagi burgʻilash jarayoni bilan tanishar ekan, mutaxassislar bilan Shoʻrtan hududidagi izlov-qidiruv ishlarining istiqbollarini ham muhokama qildi. Ushbu hududda joylashgan Shoʻrtan neft va gaz qazib chiqarish boshqarmasi, Shoʻrtan gazkimyo majmuasi hamda Uzbekistan GTL zavodining ishlab chiqarish quvvatlarini xomashyo gazi bilan taʼminlash uchun yangi istiqbolli maydonlarni topish va ularda burgʻilash ishlarini jadallashtirishga alohida eʼtibor qaratish lozimligi taʼkidlandi.
“Ishchi guruh” tomonidan “Niyoz” maydonida olib borilgan oʻrganish ishlari davomida konning istiqbollarini baholash maqsadida 10-O- sonli ishlatish qudugʻini burgʻilash joyi belgilandi. Masʼul departament boshliqlari va tashkilot rahbarlariga burgʻilash dastgohini oʻrnatish va burgʻilash ishlarini jadallik bilan boshlash boʻyicha koʻrsatmalar berildi.
Maʼlumot oʻrnida keltirish joizki, Shoʻrtan neft va gaz qazib chiqarish boshqarmasida oʻtgan 2022-yilda 11 ta gaz konlaridagi 273 ta ishlatish quduqlaridan 8,95 mlrd kub metrni tabiiy gaza qazib chiqarishga erishildi. Konlardan qazib olinayotgan gaz 8 ta gazni dastlabki tayyorlash qurilmalarida birlamchi tayyorlanib, Siquv kompressor stansiyalarida bosimi oshirilib qayta ishlash uchun “Shoʻrtan” bosh inshootiga va Shoʻrtan gaz kimyo majmuasiga uzatildi.
2023-yilda esa Shoʻrtan neft va gaz qazib chiqarish boshqarmasi tomonidan jami 191 ta geologik texnik tadbirlar amalga oshirilishi rejalashtirilgan. Ushbu tadbirlar doirasida 26 ta quduqni burgʻilash (shundan 3 ta izlov-qidiruv quduqni burgʻilash), 155 ta quduqda kapital taʼmirlash va intensifikatsiya ishlarini amalga oshirish hamda 10 ta texnologik obyektlar ishga tushiriladi. Natijada 1 148,1 mln kub metr tabiiy gaz va 13,2 ming tonna suyuq uglevodorodlar qazib chiqarishga erishish koʻzlanmoqda.
“Oʻzbekneftgaz” AJ Matbuot xizmati
Izoh (0)