O‘zbekiston qonunchiligida voyaga yetmaganlarga nisbatan zo‘ravonlik jinoyati uchun qo‘llaniladigan normada javobgarlik kuchaytirilmoqda. Bu haqda adliya vaziri matbuot kotibi Sevara O‘rinboyeva xabar berdi.
Qayd etilishicha, loyihada nomusga tegish yoxud jinsiy ehtiyojni g‘ayritabiiy usulda qondirish (118, 119-moddalar), shaxsni jinsiy aloqa qilishga majbur etish (121-modda), 16 yoshga to‘lmagan shaxs bilan jinsiy aloqa qilish (128-modda), 16 yoshga to‘lmaganga nisbatan uyasiz-buzuq harakatlar qilish (129-modda) jinoyatlari uchun jazo choralari og‘irlashtirilmoqda.
Shuningdek, o‘n sakkiz yoshga to‘lmagan jabrlanuvchining nomusiga tegish yoki unga nisbatan zo‘rlik ishlatib, jinsiy ehtiyojni g‘ayritabiiy usulda qondirgan yoxud uni jinsiy aloqa qilishga majbur etgan yoki fohishalikka jalb qilgan, voyaga yetmagan shaxs tavsiflangan pornografik mahsulotni tayyorlagan shaxslarga nisbatan jazodan tashqari boshqa javobgarlik va ta’sir choralari ham kuchaytiriladi.
Xususan, ularga nisbatan:
- jazodan muddatidan ilgari shartli ozod qilish yoki jazoni yengilrog‘i bilan almashtirish tariqasidagi insonparvarlik aktlari qo‘llanilmasligi;
- tamom bo‘lmagan jinoyatlar uchun jazo tayinlashda yengillik berilmasligi nazarda tutilgan.
Bundan tashqari, “Bola huquqlari kafolatlari to‘g‘risida”gi qonunga kiritilishi taklif etilgan yangi normaga ko‘ra, yuqoridagi jinoyatlar uchun hukm qilingan shaxslar voyaga yetmaganlarga xizmat ko‘rsatiladigan ta’lim muassasalari va sog‘liqni saqlash muassasalarida ishlashlari taqiqlanadi.
Eslatib o‘tamiz, Toshkent shahri Yangihayot tumanida 31-yanvar kuni zo‘rlik va qotillik alomatlari bilan 12 yoshli qizning murdasi topilgandi. Mazkur holat yuzasidan Yangihayot tumani prokuraturasi tomonidan Jinoyat kodeksining 97-moddasi 2-qismi “v, z” bandlari bilan jinoyat ishi qo‘zg‘atilgan. Jinoyat ishi bo‘yicha gumonlanuvchi shaxs (29 yoshli erkak) Jinoyat-protsessual kodeksining 221-moddasi tartibida ushlangan.
Mavzuga doir: Toshkentda ota-onalar farzandlarini o‘zi maktabga olib borishi tavsiya qilindi
Izoh (0)