Uzbekistan Airways 2023-yil bahor-yoz navigatsiyasidan boshlab Toshkentdan Rossiyaning ikkita shahriga yangi yo‘nalish bo‘yicha aviaqatnovlar soni oshirilishini e’lon qildi.
Ma’lum qilinishicha, Toshkent—Omsk—Toshkent yoʻnalishi boʻyicha 26-martdan haftasiga bir marta, yakshanba kunlari, shuningdek, Toshkent—Nijniy Novgorod—Toshkent yoʻnalishi boʻyicha 28-martdan haftasiga ikki marta, seshanba va shanba kunlari muntazam parvozlar amalga oshiriladi.
Aviakompaniyaning “Sharqiy” xabni rivojlantirish loyihasi doirasida aviaqatnovlar soni Namangandan ham ko‘paytirilmoqda. 27-martdan boshlab Namangan—Orenburg—Namangan yoʻnalishi boʻyicha ham parvozlar tiklanadi.
Muntazam toʻgʻridan toʻgʻri aviaqatnovlar haftada bir marta dushanba kunlari amalga oshiriladi. 31-martdan boshlab esa haftada bir marta, juma kunlari Namangan—Nijnevartovsk—Namangan yo‘nalishi bo‘yicha yangi yo‘nalish yo‘lga qo‘yiladi.
Toshkentdan, Namangandan parvoz qiluvchi yuqorida sanab o‘tilgan barcha aviaqatnovlar aviakompaniyaning kam budjetli yo‘lovchi aviatashuvchisi hisoblangan Uzbekistan Airways Express brendi ostida amalga oshirilib, aviatsiya bozorida yo‘lovchilar uchun hamyonbop narxdagi aviachiptalarni taqdim etadi.
Izoh (0)