Yakunlanayotgan haftada Surxondaryo viloyatida faoliyat yurituvchi 13 nafar hokim bir kunda ishdan olinib, ularning o‘rnini yangi rahbarlar egalladi. Qashqadaryo viloyatida esa xotinini rashk qilgan er uni arralab o‘ldirdi. “Daryo” haftaning eng shov-shuvli voqealari ketma-ketligini esga oladi.
Surxondaryoda faoliyat yurituvchi 13 nafar hokim bir kunda ishdan olinib, ularning o‘rniga yangi rahbarlar tayinlandi. Jumladan viloyatning Angor, Termiz, Muzrabot, Jarqo‘rg‘on, Sho‘rchi, Sariosiyo, Uzun, Denov, Oltinsoy, Boysun, Bandixon, Sherobod, Qiziriq tumanlarida faoliyat yurituvchi hokimlar 25-yanvar kuni ishdan olinib, ularning o‘rnini boshqalar egalladi.
Angor tumani hokimi lavozimiga 2020-yilning iyulidan beri ushbu lavozimda ishlagan Shohjahon Abdullayev o‘rniga Qosim Mardonov, Termiz tumani hokimi lavozimida ishlab kelayotgan Shuhratjon O‘rinov o‘rniga Shuhrat Nazarov, Muzrabot tumani hokimi lavozimiga tuman hokimining birinchi oʻrinbosari lavozimida ishlab kelgan Abdurashid Ismoilov, Jarqoʻrgʻonga Elmurod Avazov, Shoʻrchi tumani hokimi lavozimiga Ulugʻbek Zokirov, Sariosiyo tumaniga Abduqodir Donayev tasdiqlandi. Shuningdek, Uzun tumani hokimi lavozimiga Xabibulla Bozorov, Denov tumani hokimi lavozimiga Ilhom Abrorov, Oltinsoy tumani hokimi lavozimiga Bahrom Mahmatrayemov, Boysun tumaniga Bahodir Shukurov, Bandixon tumaniga Abdumalik Allamurodov, Sherobod tumani hokimi lavozimiga Zaynobiddin Xalilov, Qiziriq tumaniga Sherzod Rajabovlar munosib ko‘rilgan.
Bu haftada shuningdek, Qoraqalpog‘iston Respublikasi Vazirlar Kengashi raisining jamoat va diniy tashkilotlar bilan aloqalar bo‘yicha o‘rinbosari ham o‘zgardi.
Maʼlum bo‘lishicha, bu lavozimga Rajabboy Nurazizov tayinlangan. Rajabboy Nurazizov tayinlovga qadar DXXning Qoraqalpog‘iston Respublikasi boshqarmasida masʼul lavozimda faoliyat olib borgan.
Qashqadaryo viloyatining Qarshi tumanida xotinini rashk qilgan er uni zanjirli arra bilan o‘ldirdi.
Qotillik sodir etilgan mahalla masʼullarining maʼlumot berishicha, er-xotin o‘rtasida avvaldan kelishmovchilik bo‘lgan. Faollar ularni yarashtirishga uringan. Ammo ayoli haqida turli gumonda bo‘lgan er xotini bilan yarashishni xohlamagan.
“Taraqqiyot” mahallasi faoli Dilnavoz Hamroyevaning aytishicha, marhuma turmush o‘rtog‘i bilan janjali sabab besh-olti oydan beri o‘z xonadonida alohida yashab kelgan.
“Taraqqiyot” MFY raisi Ergash Xudoqulovning maʼlumot berishicha, marhuma rashk sabab o‘ldirilgan.
Xotinining telefoni eriga ulangan ekan. Eri xotinini har xil yigitlar bilan gaplashadi deb gumon qilgan. Xullas, janjalga shu rashk sabab bo‘lgan, — deydi MFY raisi.
Raisning qo‘shimcha qilishicha, qotillik haqida unga xotinini arralab o‘ldirgani aytilayotgan erkakning otasi xabar bergan.
Andijon viloyatining Xo‘jaobod tumanida ham 25-yanvar kuni 30 yoshli erkak ammasi va jiyanini o‘ldirdi.
Qayd etilishicha, soat 18:30 da erkak ammasining yashash uyida kredit qarzdorligini to‘lash uchun qarzga pul so‘ragan va ammasidan rad javobini olgan.
Rad javobidan jahli chiqqan erkak pul mablag‘larini qo‘lga kiritishni maqsad qilib, ammasi va u bilan yashovchi jiyanini xo‘jalik pichog‘i bilan qasddan o‘ldirgan.
O‘zbekistonda 30-yanvardan boshlab eski namunadagi haydovchilik guvohnomasini onlayn almashtirish imkoniyati yaratiladi.
Adliya vazirligi xabariga ko‘ra, eski namunadagi haydovchilik guvohnomasini uydan turib, YIDXP (my.gov.uz) yangisiga almashtirish mumkin bo‘ladi.
Buning uchun (my.gov.uz) orqali buyurtma beriladi. Buyurtmada:
- bo‘sh qatorlar o‘zingizga tegishli shaxsiy ma’lumotlar bilan to‘ldiriladi;
- tegishli bandlar tanlanadi;
- yangi haydovchilik guvohnomasi yetkazib beriladigan manzil ko‘rsatiladi;
- mobil telefon yoki kompyuter orqali shaxsiy imzo qo‘yiladi;
- so‘nggi qadamda invoys shakillanadi va BHMning 70 foizi (210 000 so‘m) miqdorida hamda pochta xizmati uchun 25 000 so‘m to‘lov amalga oshiriladi.
Markaz xodimi, kelib tushgan buyurtmani ko‘rib chiqib, chop etgan yangi namunadagi haydovchilik guvohnomasini pochta xizmatiga taqdim etadi. Pochta xizmati tomonidan ikki ish kunida manzil bo‘yicha yetkaziladi va sizdan eski namunadagi haydovchilik guvohnomasini va talonni olib, yangisini taqdim etadi. Pochta xizmati eski namunadagi haydovchilik guvohnomasini va talonini DXMga topshiradi.
Izoh (0)