Angor tumaniga yangi hokim tayinlandi. U ayni kunda Surxondaryo viloyatidagi eng yosh hokim hisoblanadi

Surxondaryo viloyatining Angor tumaniga yangi hokim tayinlandi. Bu haqda “Daryo”ga ma’lum qilgan viloyat hokimligi axborot xizmati rahbari Zahiriddin To‘rayevning ta’kidlashicha, ushbu lavozimga viloyat iqtisodiy taraqqiyot va kambag‘allikni qisqartirish bosh boshqarmasi boshlig‘i birinchi o‘rinbosari sifatida ishlab kelgan Shohjahon Abdullayev munosib ko‘rilgan.

Ta’kidlanishicha, ushbu masala yuzasidan Xalq deputatlari Angor tumani kengashining navbatdan tashqari sessiyasi 11-iyul, shanba kuni bo‘lib o‘tgan. Sessiyada karantin qoidalariga amal qilgan holda Zoom dasturi orqali viloyat hokimi To‘ra Bobolov ham ishtirok etib, tumanni ijtimoiy-iqtisodiy rivojlantirish, mavjud imkoniyat va resurslardan samarali foydalanish borasida faollar oldida turgan dolzarb vazifalar haqida so‘z yuritgan.

Sessiya ishida Angor tumani hokimi sifatida ishlab kelgan Usmon Turopov viloyat hokimining qishloq va suv xo‘jaligi masalalari bo‘yicha o‘rinbosari etib tayinlanganligi munosabati bilan lavozimidan ozod qilingani, o‘rniga Shohjahon Abdullayev hokim etib tasdiqlanishi masalasi ko‘rib chiqilgan.

Ma’lum qilinishicha, Shohjahon Abdullayev 1987-yil Oltinsoy tumanida tug‘ilgan bo‘lib, 2009-yilda Termiz davlat universitetini, 2020-yilda O‘zbekiston Prezidenti huzuridagi Davlat boshqaruvi akademiyasini tamomlagan.

Mehnat faoliyati davomida viloyat iqtisodiyot bosh boshqarmasi bo‘lim boshlig‘i, boshqarma boshlig‘i o‘rinbosari, Sho‘rchi tuman hokimining birinchi o‘rinbosari, viloyat iqtisodiyot va sanoat bosh boshqarmasi boshlig‘i, 2020-yil boshidan viloyat iqtisodiy taraqqiyot va kambag‘allikni qisqartirish bosh boshqarmasi boshlig‘ining birinchi o‘rinbosari lavozimlarida ishlab kelgan.

Zahiriddin To‘rayevning qo‘shimcha qilishicha, 11-iyul kuni Qiziriq tumaniga ham yangi hokim tayinlanadi.