“Barselona” Ispaniya Kubogida 1500-golini urdi. Bu rekord natija

“Barselona” Ispaniya Kubogining chorak finalida “Real Sosyedad”ni yengib (1:0), yarim final yo‘llanmasiga ega chiqdi.

Uchrashuvdagi yagona to‘p 52-daqiqada Usmon Dembele tomonidan kiritildi. MisterChip ma’lumotlariga ko‘ra, bu katalonlar uchun Ispaniya Kubogining 121 yillik tarixidagi 1500-gol bo‘ldi. “Barselona” bu natijaga erishgan ilk jamoaga aylandi.

“Barselona”ning Ispaniya Kubogidagi ilk goliga 1909-yilda Roma Forns, 500-goliga Ladislav Kubala (1952-yil), 1000-goliga Roberto (1987) muallif bo‘lgandi.

“Ko‘k-anorranglilar” ushbu musobaqada g‘alaba qozonish bo‘yicha ham rekordchi hisoblanadi. “Barselona” 31 marta kubokka ega chiqqan.

Ispaniya Kubogining amaldagi g‘olibi “Betis” hisoblanadi. Jamoa o‘tgan mavsum finalda “Valensiya”ni mag‘lub etib (1:1, 5:4), sovringa ega chiqqandi.