Rossiya prezidenti Vladimir Putin o‘zining “xakerlar armiyasi”ga Ukrainada sinab ko‘rilgan taktika yordamida Britaniyaning muhim infratuzilmasiga hujum qilishni topshirgan. Bu haqda The Times gazetasi Mudofaa vazirligidagi manbalarga tayanib yozmoqda.
“2014-yilda Qrim anneksiya qilinganidan so‘ng Kiyev temiryo‘llari va milliy energetika tizimi Rossiya kiberhujumlarining to‘lqiniga uchragandi. 2022-yilgi bosqin oldidan kiberhujumlar Ukraina hukumati va bank xizmatlarining ishini to‘xtatib qo‘ydi va bu Rossiya qo‘shinlariga chegarani kesib o‘tishga imkon berdi”, — deyiladi The Times maqolasida.
Mudofaa vazirligidagi manbalarga ko‘ra, Britaniya infratuzilmasi ham shunday hujumlarga uchrashi mumkin.
Ukraina rasmiylari “Rossiya taktikasi haqida ma’lumot almashish va Britaniya hukumatiga kiberxavfsizlik masalalarida maslahat berish” uchun shu hafta Londonga tashrif buyurgan.
“Rossiyada maxsus xizmatlarda uzoq vaqt xizmat qilgan yuqori professional xakerlar bor. Buyuk Britaniya Rossiyadan kelishi mumkin bo‘lgan bu tahdidlardan boxabar bo‘lishi kerak”, — dedi Ukraina Maxsus aloqa va axborotni himoya qilish davlat xizmati rahbari o‘rinbosari Viktor Jora.
Ma’lumot uchun 19-yanvar kuni ertalab Buyuk Britaniya Ukrainaga yangi yordam paketi doirasida 200 dona zirhli texnika berishga qaror qildi.
“Buyuk Britaniya Ukrainaga yordamni yanada jadallashtirishga qaror qildi va do‘stlarimizni Challenger 2 asosiy jangovar tanklari, og‘ir artilleriya va 200 dan ortiq boshqa zirhli mashinalar bilan ta’minlashga qaror qildi”, — deydi Britaniya tashqi ishlar vaziri Jeyms Kleverli.
Izoh (0)