Россия президенти Владимир Путин ўзининг «хакерлар армияси»га Украинада синаб кўрилган тактика ёрдамида Британиянинг муҳим инфратузилмасига ҳужум қилишни топширган. Бу ҳақда The Times газетаси Мудофаа вазирлигидаги манбаларга таяниб ёзмоқда.
«2014 йилда Қрим аннексия қилинганидан сўнг Киев темир йўллари ва миллий энергетика тизими Россия киберҳужумларининг тўлқинига учраганди. 2022 йилги босқин олдидан киберҳужумлар Украина ҳукумати ва банк хизматларининг ишини тўхтатиб қўйди ва бу Россия қўшинларига чегарани кесиб ўтишга имкон берди», — дейилади The Times мақоласида.
Мудофаа вазирлигидаги манбаларга кўра, Британия инфратузилмаси ҳам шундай ҳужумларга учраши мумкин.
Украина расмийлари «Россия тактикаси ҳақида маълумот алмашиш ва Британия ҳукуматига киберхавфсизлик масалаларида маслаҳат бериш» учун шу ҳафта Лондонга ташриф буюрган.
«Россияда махсус хизматларда узоқ вақт хизмат қилган юқори профессионал хакерлар бор. Буюк Британия Россиядан келиши мумкин бўлган бу таҳдидлардан бохабар бўлиши керак», — деди Украина Махсус алоқа ва ахборотни ҳимоя қилиш давлат хизмати раҳбари ўринбосари Виктор Жора.
Маълумот учун 19 январь куни эрталаб Буюк Британия Украинага янги ёрдам пакети доирасида 200 дона зирҳли техника беришга қарор қилди.
«Буюк Британия Украинага ёрдамни янада жадаллаштиришга қарор қилди ва дўстларимизни Challenger 2 асосий жанговар танклари, оғир артиллерия ва 200 дан ортиқ бошқа зирҳли машиналар билан таъминлашга қарор қилди», — дейди Британия ташқи ишлар вазири Жеймс Клеверли.
Изоҳ (0)