AQSHning Microsoft kompaniyasi Rossiya harbiy razvedkasiga aloqador xakerlarni oktyabr oyida Ukraina va Polshadagi transport hamda logistika tashkilotlarining to‘lov dasturiga kiber hujum qilishda aybladi. Bu haqda kompaniya vakiliga tayanib, CNN xabar berdi.
Ma’lum qilinishicha, javobgarlik Rossiya Bosh razvedka boshqarmasi bilan aloqadorligi aytilayotgan Sandworm (Iridium) xakerlar guruhi zimmasiga yuklatildi. Bu guruh kiberhujumlar uchun noma’lum bo‘lgan Prestige to‘lov dasturidan foydalangan. U hujumga uchragan kompyuter tizimidagi barcha fayllarni skanerdan o‘tkazib, .txt, .png, gpg va 200 dan ortiq boshqa kengaytmali fayllar tarkibini shifrlagan.
Microsoft dastlab hujumga DEV-0960 deb nomlangan noma’lum guruh aloqadorligini e’lon qilgandi, ammo yangi bayonotida hujumlar ortida Sandworm (Iridium) turganini qayd etdi.
Kiberhujumga uchragan tashkilotlarni qanday xavf kutmoqda?
Prestige dasturi yordamida xakerlar allaqachon hujumga uchragan tashkilotlarning tarmoqlarini nazoratga oldi. 11-oktabr kuni xakerlar Prestige’ni barcha virusli qurilmalarga joylashtirgandi, deya ta’kidladi CNN manbasi. Bu esa Ukrainaga gumanitar yoki harbiy yordamni to‘g‘ridan-to‘g‘ri etkazib beradigan yoki tashiydigan tashkilotlar uchun xavf ortib borayotganidan dalolat beradi.
10-oktabr kuni AQSHdagi eng yirik aeroportlarning ba’zilariga rossiyalik xakerlar hujum uyushtirgandi. Ilk kiberhujumlar Nyu-Yorkdagi La-Guardiya aeroportiga nisbatan amalga oshirilgan. Keyinroq mutaxassislar Los-Anjeles xalqaro aeroporti va Chikagodagi O’Xara xalqaro aeroporti saytlarida ham nosozliklarni qayd etgan.
CNN telekanali qayd etishicha, 14 ta aeroportlar saytlarining ishdan chiqishiga Killnet xakerlar guruhi sababchidir. Uning asoschisi Kill Milk o‘zini Rossiyaning qonunga rioya qiladigan fuqarosi deb atadi va guruhning asosiy maqsadi “dushmanga munosib javob berish va yer yuzidagi tinchlik”dan iborat ekanini aytdi.
Izoh (0)