Yoz kelganda insonlar beixtiyor ko‘proq pul sarflay boshlaydi: kimdir qimmat sayohatlarga otlanadi, boshqalar garderobini yangilashga shoshiladi, ayrimlar esa ko‘ngilochar tadbirlarga katta mablag‘ sarflaydi. Ammo “shartli” hisoblangan bu xarajatlar nafaqat oila byudjetiga jiddiy zarar yetkazishi, balki sog‘liqqa ham salbiy ta’sir ko‘rsatishi mumkin. Quyida yozda xarid qilish tavsiya etilmaydigan buyumlar haqida so‘z yuritamiz.
1. Faqat oq rangli kiyimlarni tanlash
Dermatologlar yozda uzun, qo‘llarni yopadigan va yengil liboslar kiyishni tavsiya etadi. Ammo aynan to‘q rangli kiyimlar oq ranglarga qaraganda ultrabinafsha nurlardan yaxshiroq himoya qiladi. Masalan, uzun yengli jinsi ko‘ylak taxminan 1 700 SPF darajasida quyoshdan himoya beradi, oq futbolka esa atigi 7 SPF atrofida himoyalaydi.
2. Issiq kunlar uchun kepka xarid qilish
Ko‘pchilik bolaligidan yozda bosh kiyimi sifatida kepka kiyishga odatlangan, lekin ahamiyat berilsa, kepka boshni deyarli himoya qilmaydi: u yuz, quloq va bo‘yinni yopmaydi. Uning o‘rniga keng bichimli shlyapa kiyish afzalroq.
3. Plastik butilkadan suv ichish odati
Arizona shtatining Ekologik salomatlik markazi mutaxassislari xulosasiga ko‘ra, issiq havoda plastik idishlardagi ichimliklar tarkibiga zararli moddalar ko‘proq ajralib chiqadi. Shu sababli, yozda ichimliklarni shisha idishda sotib olish tavsiya etiladi. Plastik idishdagi ichimlikni esa quyosh nuri ostida qoldirmaslik kerak.
4. Plyajdagi taomlar uchun keraksiz xarajatlar
Plyajga tashrif buyurganda o‘zingiz bilan uyda tayyorlangan biror tamaddi, masalan, sendvich olib borish ancha tejamli variant. Chunki odatda, plyajlardagi ovqatlar qimmat bo‘ladi va ular doim ham sog‘liq uchun foydali bo‘lavermaydi.
5. Yozgi kiyimlar uchun ortiqcha xarajat qilish
Reklamalar ta’sirida ko‘pchilik yoz boshlanishi bilan yangi shortik, panama yoki quyoshdan saqlovchi ko‘zoynak sotib olishga oshiqadi. Aslida esa, o‘tgan yilda xarid qilingan kiyimlar uydagi javonda ham hali yaroqli holatda turgan bo‘ladi. Agar garderobni yangilashga ishtiyoq kuchli bo‘lsa, kamida bir necha mavsumga yetadigan, amaliy kiyimlarni tanlash va mavsumiy chegirmalarga e’tibor berish kerak.
Reddit foydalanuvchilari yozda qishki kiyimlarni sotib olish arzonroq tushishini ta’kidlaydi:
“O‘tgan hafta 75 foiz chegirma bilan qishki palto sotib oldim. Eng qizig‘i, men aynan shunday paltoni aprel oyida izlagandim. Ammo iyunda do‘konda topdim. Juda omadli xarid bo‘ldi!”, deydi Reddit foydalanuvchisi.
6. Quyoshdan saqlovchi arzon ko‘zoynaklar
Yozgi garderobdagi eng muhim buyum ko‘zoynakdir. U nafaqat ko‘zni quyoshdan pana qilishi, balki UV nurlaridan ham yaxshi himoyalashi kerak. Ko‘zoynakning qanchalik to‘q rangda bo‘lishi uning quyoshdan himoya darajasini anglatmaydi. Muhimi, ishlab chiqaruvchi ko‘zoynakning quyosh nurlariga qarshi qanday himoya taqdim etishini aniq ko‘rsatgan bo‘lishi lozim.
7. Bolalar uchun qimmatbaho ko‘ngilochar mashg‘ulotlar
Ba’zida ota-onalar farzandlari uchun albatta qimmat kurortlar yoki xorijiy tilga ixtisoslashgan lagerlarini tanlashga urinadi. Reklama ta’sirida ota-onalar farzandlarini doimiy ravishda ko‘ngilochar mashg‘ulotlarga jalb qilishi kerak, deb o‘ylashadi. Aslida esa farzandga yaxshi tarbiya berish uchun boshqa narsalar muhimroq. Masalan, har bir muammoni bola bilan tinch holatda gaplashib olish, birgalikda oilaviy sayr qilish yoki uyqudan avval ertak o‘qib berish kabilar bolalarga ko‘proq zavq beradi.
8. Quyoshdan saqlovchi kremning yog‘li turidan foydalanish
Plyajga yopishqoq tarkibga ega quyoshdan saqlovchi krem olib borish — pulni bekorga sarflash va kayfiyatni buzish demakdir. Chunki bunday krem surtilgan tanaga qum darrov yopishib qoladi. Uning o‘rniga tarkibi mineral moddalardan iborat va gel ko‘rinishidagi quyoshdan saqlovchi vositalarni tanlash maqsadga muvofiq.
Izoh (0)