Microsoft 11 mingga yaqin xodimini ishdan bo‘shatishni rejalashtirmoqda
Amerika dasturiy ta’minot ishlab chiqaruvchisi Microsoft global iqtisodiyotdagi pasayish tufayli 10 mingdan ortiq ish o‘rinlarini qisqartirishga tayyorlanmoqda. Bu haqda manbalarga tayanib, Sky News xabar bermoqda.
Microsoft o‘z xodimlarining taxminan 5 foizini qisqartirishni ko‘rib chiqmoqda, bu 11 mingga yaqin ish o‘rinlarini tashkil etadi.
Ishdan bo‘shatish bir qator muhandislik bo‘limlari va kadrlar bo‘limiga ta’sir qilishi mumkin.
Insider ma’lumotlariga ko‘ra, Microsoft ham ko‘plab bo‘linmalarda ishga qabul qilishga moratoriy joriy qilgan. Kompaniyaning rejalari bilan tanish bo‘lgan nashr manbasining aytishicha, kompaniya ishga yollovchilar shtatini 30 foizga qisqartirishi mumkin.
Ma’lumotlarga ko‘ra, kompaniya bir-ikki yil ichida oldingi ishga olish tezligiga qaytishni rejalashtirmoqda.
Bloomberg’ning yozishicha, kompaniya boshqa texnologiya gigantlari kabi uzoq davom etadigan iqtisodiy tanazzulga tayyorlanmoqda.
Amazon, Meta va Salesforce kabi texnologiya gigantlari so‘nggi bir necha oy ichida minglab odamlarni ishdan bo‘shatishini e’lon qilgan.
Vashingtonda joylashgan Microsoft hozirgi kunga qadar yomonlashib borayotgan global iqtisodiy prognoz, dasturiy ta’minot va xizmatlarga bo‘lgan talabning uzoq davom etadigan sekinlashuvi potensialiga qarshi kurashish uchun kichikroq qadamlar tashlamoqda.
Hujjatlarga ko‘ra, 2022-yil 30-iyun holatiga ko‘ra, kompaniyada 221 ming nafar xodim ishlagan, ulardan 122 ming nafari AQSHda va 99 ming nafari boshqa mamlakatlarda. Ayni paytda kompaniyaning bozor qiymati 1,78 trillion dollarni tashkil etadi.
Mavzuga doir:
- “Javobgarlikni o‘z zimmamga olaman”. Mark Sukerberg Meta kompaniyasi 11 ming xodimini ishdan bo‘shatishini e’lon qildi
- Amazon 18 mingdan ortiq xodimini ishdan olishini e’lon qildi
