Америка дастурий таъминот ишлаб чиқарувчиси Microsoft глобал иқтисодиётдаги пасайиш туфайли 10 мингдан ортиқ иш ўринларини қисқартиришга тайёрланмоқда. Бу ҳақда манбаларга таяниб, Sky News хабар бермоқда.
Microsoft ўз ходимларининг тахминан 5 фоизини қисқартиришни кўриб чиқмоқда, бу 11 мингга яқин иш ўринларини ташкил этади.
Ишдан бўшатиш бир қатор муҳандислик бўлимлари ва кадрлар бўлимига таъсир қилиши мумкин.
Insider маълумотларига кўра, Microsoft ҳам кўплаб бўлинмаларда ишга қабул қилишга мораторий жорий қилган. Компаниянинг режалари билан таниш бўлган нашр манбасининг айтишича, компания ишга ёлловчилар штатини 30 фоизга қисқартириши мумкин.
Маълумотларга кўра, компания бир-икки йил ичида олдинги ишга олиш тезлигига қайтишни режалаштирмоқда.
Bloomberg’нинг ёзишича, компания бошқа технология гигантлари каби узоқ давом этадиган иқтисодий таназзулга тайёрланмоқда.
Amazon, Меtа ва Salesforce каби технология гигантлари сўнгги бир неча ой ичида минглаб одамларни ишдан бўшатишини эълон қилган.
Вашингтонда жойлашган Microsoft ҳозирги кунга қадар ёмонлашиб бораётган глобал иқтисодий прогноз, дастурий таъминот ва хизматларга бўлган талабнинг узоқ давом этадиган секинлашуви потенциалига қарши курашиш учун кичикроқ қадамлар ташламоқда.
Ҳужжатларга кўра, 2022 йил 30 июнь ҳолатига кўра, компанияда 221 минг нафар ходим ишлаган, улардан 122 минг нафари АҚШда ва 99 минг нафари бошқа мамлакатларда. Айни пайтда компаниянинг бозор қиймати 1,78 триллион долларни ташкил этади.
Мавзуга доир:
Изоҳ (0)