2022-yilda narxlar oshishi sababli Yaponiya kompaniyalari o‘rtasida bankrotlik holatlari 2021-yilga nisbatan ikki baravar ko‘paydi. Bu haqda Teikoku Databank statistik markazi tayanib, “TASS” xabar bermoqda.
O‘tgan yilning 12 oyi davomida neft, yoqilg‘i va xomashyo “sotib olish narxining oshishi” hamda buning natijasida yetkazib beruvchilar bilan bog‘liq muammolar tufayli yuzaga kelgan 320 ta bankrotlik holati aniqlangan.
Bu 2021-yilga nisbatan 2,3 barobar ko‘p, o‘shanda mazkur ko‘rsatkich 138 tani tashkil qilgan.
Ushbu bankrotliklarning asosiy qismi qurilish sohasida (70 ta), ikkinchi o‘rinda transport va kommunikatsiyalar sohasida (64), uchinchi o‘rinda esa ishlab chiqarish sanoatida (61) qayd etilgan.
“Hozirda energiya va oziq-ovqat narxining o‘sish sur’ati sekinlasha boshladi, ammo vaziyat hali ham qiyin. Shu bois, kelajakda narxlarning oshishi davom etishi mumkin, bu esa tegishli sabablarga ko‘ra bankrotlik holatlari sonining ko‘payishiga olib keladi”, — deya ta’kidlagan tadqiqot mualliflari.
2022-yilda jami 6,4 ming yapon kompaniyasi bankrot deb e’lon qilindi, bu 2021-yilga nisbatan 5 foizga ko‘pdir. Tegishli ko‘rsatkichning o‘sishi Yaponiyada so‘nggi uch yil ichida birinchi marta qayd etildi.
Bankrot kompaniyalarning qarz majburiyatlarining umumiy miqdori qariyb 2,3 trillion iyenani (taxminan 17,4 milliard dollar) tashkil etdi.
Pandemiya, shuningdek, Ukraina atrofidagi vaziyat va Rossiyaga qarshi turli sanksiyalar joriy etilishi munosabati bilan hozirda Yaponiya kompaniyalari xomashyo va energiya resurslari narxining oshishi bilan bog‘liq bir qator qiyinchiliklarga duch kelmoqda.
Bundan tashqari, ba’zi firmalar Rossiyaga qarshi sanksiyalar qo‘llanilgandan va ta’minot zanjirlari uzilganidan keyin sotib olingan mahsulotlarning analoglarini izlashga majbur bo‘ldi.
Narx siyosatining beqarorligining yana bir omili yapon iyenasining qadrsizlanishi bo‘lib, bu import xarajatlarining oshishiga va natijada ishlab chiqarish jarayonidagi yuqori xarajatlarga olib keladi.
Yaponiya 24 yil ichida birinchi marta 22-sentabrda valyuta intervensiyasini amalga oshirgan. Ya’ni Yaponiya o‘z valyutasini AQSH dollariga nisbatan yanada zaiflashishiga yo‘l qo‘ymaslik uchun iyena sotib olib, uning qiymatini oshirishga harakat qilgan.
2022-yilning oktabrida mamlakat valyutasi dollarga nisbatan so‘nggi 32 yildagi eng past darajaga yetgan. Keyinchalik valyuta kursi barqarorlashgan.
Izoh (0)