Twitter’ning kunlik daromadi reklama beruvchilarning yo‘qotilishi oqibatida o‘tgan yilning shu davriga nisbatan 40 foizga kamaydi. Bu The Information portaliga tayanib, “TASS” xabar berdi.
Ijtimoiy tarmoqlarda reklama bo‘yicha menejer Siddxart Raoning so‘zlariga ko‘ra, oktabr oxirida Ilon Mask Twitter’ni sotib olganidan so‘ng 500 dan ortiq eng yaxshi reklama beruvchilar kompaniya bilan ishlashni to‘xtatdi.
Dekabr oyi oxirida Twitter ijtimoiy tarmog‘i reklama beruvchilarning bilan shartnomalarning kamayib ketgani va yaqin oradagi qarz to‘lovlari tufayli yangi investorlarni qidirayotgani haqida xabar berilgan.
Ma’lumotlarga ko‘ra, Twitter egasi Ilon Maskning oilaviy ofis boshqaruvchi direktori Jared Burchall shu hafta potensial investorlarga kompaniya aksiyalarini 54,2 dollardan sotib olishni taklif qildi.
Bu Mask oktabr oyida kompaniyani sotib olishda har bir aksiya uchun to‘lagan summaga teng.
Mask kompaniya xarajatlarini kamaytirish bo‘yicha olib borayotgan siyosat 2023-yilni yo‘qotishlarsiz yakunlash imkonini berishini ta’kidlagan.
Ilon Mask Twitter’ni sotib olganidan so‘ng, uning boshqaruv siyosati tufayli ko‘plab reklama beruvchilar ijtimoiy tarmoq bilan shartnomalarini to‘xtatib qo‘ygan va bu jarayon davom etmoqda.
Bu kompaniyaning daromadlari va 13 milliard dollarlik qarzi bo‘yicha foizlarni to‘lash qobiliyatiga jiddiy ta’sir ko‘rsatadi.
Ilon Mask Twitter’ni sotib olish bo‘yicha kelishuvni 27-oktabr kuni yakunlab, kompaniya uchun 44 milliard dollar to‘lagan.
Shundan so‘ng tadbirkor ijtimoiy tarmoq xodimlarining yarmiga yaqinini ishdan bo‘shatdi, qolganlarni esa yuqori intensivlik bilan ishlash kerakligi haqida ogohlantirdi.
OAV xabarlariga ko‘ra, ushbu voqealar fonida platforma faoliyatini saqlab qolish uchun muhim bo‘lgan ko‘plab xodimlar Twitter’ni tark etgan.
Izoh (0)