Amazon 18 mingdan ortiq xodimini ishdan olishini e’lon qildi
Amazon avval e’lon qilingan 10 ming nafar o‘rniga 18 mingdan ortiq xodimlarini qisqartiradi. Bu haqda onlayn-riteyler bosh direktori Endi Jessiga tayanib Bloomberg xabar bermoqda.
O‘tgan yilning noyabr oyida Amazon rahbariyati 10 ming kishini ishdan bo‘shatishni rejalashtirayotgani haqida xabar berilgan edi.
Bosh direktor tushuntirishicha, bu qaror 2023-yilni rejalashtirishning bir qismi sifatida “iqtisoddagi noaniqlik va so‘nggi ikki yil ichida ko‘p sonli xodimlarni yollash munosabati bilan” qabul qilingan.
Shu bilan birga, uning so‘zlariga ko‘ra, o‘sha paytda rahbariyat xodimlarni qo‘shimcha qisqartirishlar istisno qilinmagani haqida ogohlantirgan.
Ta’kidlanishicha, asosan savdo va ishga yollash bo‘limlaridagi xodimlar ishdan bo‘shatiladi.
Oxirgi ikki yil ichida koronavirus pandemiyasi tufayli onlayn xizmatlarga talab ortishi sababli Amazon xodimlari soni deyarli ikki baravar oshgan edi.
Sanitariya cheklovlari olib tashlangani sababli kompaniya daromadlarining o‘sishi sekinlashdi.
The Wall Street Journal ma’lumotlariga ko‘ra, Amazon’da 2022-yil sentabr holatiga ko‘ra 1,5 millionga yaqin odam ishlagan.
Avvalroq Amazon asoschisi o‘z boyligining katta qismini xayriya qilmoqchiligini ma’lum qilgan edi.
