Nepal poytaxti Katmandudan Poxara shahriga uchayotgan ATR 72 yo‘lovchi samolyotining qulashiga texnik nosozlik sabab bo‘lishi mumkin. Bu haqda My Republica xabar berdi.
Nepal fuqaro aviatsiyasi ma’muriyati vakili Gyanendra Bxul bu bo‘yicha ma’lumot bergan.
“Ob-havo bilan bog‘liq hech qanday muammo yo‘q edi, dastlabki ma’lumotlarga ko‘ra, samolyot texnik sabablar tufayli halokatga uchragan. Samolyot havoda bo‘lganida alanga qayd etilgani haqida ma’lumot olingan”, — dedi Bxul.
Samolyotning qulashiga aniq nima sabab bo‘lganini Nepal rasmiylari 45 kun ichida tayyor bo‘ladigan maxsus komissiya hisobotida e’lon qiladi.
Nepaldan uchgan ATR 72 yo‘lovchi samolyoti 15-yanvar kuni Nepal poytaxti Katmandudan Poxaraga parvoz qilgan va qo‘nish chog‘ida halokatga uchragan. Parvozni amalga oshirgan Yeti Airlines aviakompaniyasining barcha 68 yo‘lovchisi va 4 nafar ekipaj a’zosi halok bo‘lgan.
Yo‘lovchilar orasida: 53 nafar nepal, besh nafar hind, to‘rt nafar rus, ikki nafar koreys, Irlandiya, Argentina, Avstraliya va Fransiyadan bittadan fuqaro bo‘lgan. Holat yuzasidan Nepal hukumati bir kunlik milliy motam e’lon qilgan. Fransiyaning AFP agentligi Kaski tumani rahbari o‘rinbosari Gurudatta Dxakalga tayanib, aviahalokatda tirik qolganlar borligini aytmoqda.
Nepal News nashri xabarlariga ko‘ra, voqea joyida 68 kishining jasadi topilgan, to‘rt kishi bedarak yo‘qolgan deb hisoblanmoqda.
Izoh (0)