Burkina-Faso shimolidagi So‘m viloyatida 12 va 13-yanvar kunlari qurollangan shaxslar 50 ga yaqin ayolni o‘g‘irlab ketdi. Bu haqda Al Jazeera xabar berdi.
Qurollangan erkaklar ayollarni Liki qishlog‘i tashqarisida meva terayotgan paytda qo‘lga olgan. Hukumatning dushanba kungi bayonotida aytilishicha, “barcha begunoh qurbonlarni sog‘-salomat topish maqsadida qidiruv boshlangan”. Armiya tomonidan hozirgacha olib borilgan qidiruv jarayoni muvaffaqiyatsiz yakunlangan.
Dunyoning eng qashshoq davlatlaridan biri bo‘lgan Burkina-Faso 2015-yilda qo‘shni Malidan tarqalib ketgan “Al-Qoida” va ISHIDga aloqador qurolli guruhlarning zo‘ravonlik harakatlarining oldini olish uchun kurashmoqda. Bu jarayonda minglab tinch aholi va xavfsizlik kuchlari a’zolari halok bo‘lgan, ikki millionga yaqin odam o‘z uyini tark etib, vaqtinchalik lagerlarda yashashga majbur bo‘lgan.
2021-yil avgust oyida Burkina-Fasoda avtomashinalar karvoniga uyushtirilgan hujum chog‘ida 80 kishi, jumladan, 65 nafar tinch aholi vakili halok bo‘lgandi.
Izoh (0)