Britaniya Mudofaa vazirligi razvedka ma’lumotiga tayanib, Ukraina sharqidagi vaziyatni tahlil qildi va ikki tomonning asosiy operativ vazifasini ma’lum qildi.
Ma’lum qilinishicha, dam olish kunlarida Kremensk va Baxmut yo‘nalishlarida shiddatli janglar davom etgan. 15-yanvar holatiga ko‘ra, Ukraina qurolli kuchlari “Vagner” guruhining davomiy hujumlariga qaramay, Baxmut shimolidagi Soledarda aniq pozitsiyalarni egallagan.
Kremennaya atrofida janglar o‘rmonli hududda bir qator mahalliy hujumlar va qarshi hujumlar bilan tavsiflanadi. Ukraina qurolli kuchlari asta-sekin o‘zlarining front chizig‘ini sharqqa, Kremennaya shahri chekkasiga olib borishda davom etmoqda.
Razvedkaning ta’kidlashicha, so‘nggi olti hafta ichida Rossiya ham, Ukraina ham turli yo‘nalishlarda og‘ir, ammo cheklangan yutuqlarga erishgan. Bunday sharoitda har ikki tomonning asosiy operativ vazifasi tezkor yutuqlarga erishish uchun taktik muvaffaqiyatlardan foydalana oladigan jangovar tayyor qo‘shinlar yaratishdir.
Avvalroq Britaniya razvedkasi rus qo‘shinlari Baxmutni egallashi ehtimolini baholagandi. Soledar Baxmutdan 10 kilometr shimolda joylashgan bo‘lib, uni qo‘lga kiritish Rossiyaning asosiy tezkor maqsadi bo‘lib qolmoqda. Ammo Baxmutni egallashga bosim kuchayganiga qaramay, Britaniya razvedkasiga ko‘ra, Rossiya yaqin kelajakda shaharni o‘rab olishi dargumon. Bu Ukraina qo‘shinlarining barqaror mudofaa chizig‘ini saqlab turishi va ta’minot yo‘llarini nazorat qilishi bilan bog‘liq.
Mavzuga doir:
Izoh (0)