Afg‘onistonning Hirot, Bag‘lon va G‘azni viloyatlarida anomal sovuq tufayli 24 nafar giyohvand va bir nafar cho‘pon vafot etdi. Bu haqda Hasht-e Subh Daily xabar berdi.
Bag‘londagi manbalar Puli Xumri shahri yaqinida besh nafar giyohvandning jasadi topilganini xabar qilgan. Ulardan uch nafari “Tolibon” munitsipaliteti tomonidan dafn etilgan, yana ikki nafarining jasadi Bag‘lon viloyatidagi o‘likxonada saqlanmoqda.
Hirot viloyatidagi manbalar esa so‘nggi bir necha kun ichida 19 nafar giyohvand erkak sovuqdan vafot etganini ma’lum qilgan.
Ta’kidlanishicha, odamlarning aksariyati ko‘ngilochar bog‘larda, jumladan, Hirot shahrining Kamer Kalag hududida vafot etgan. G‘azni viloyati Naver tumanida anomal sovuq tufayli cho‘pon halok bo‘lgan. Afg‘onistonda ham so‘nggi bir necha kun ichida anomal sovuqlik kuzatilmoqda, oqibatda odamlar vafot etmoqda.
Avvalroq BMTning gumanitar masalalarni muvofiqlashtirish boshqarmasi Afg‘onistonda havo harorati -35 darajagacha sovishi kutilayotganidan ogohlantirgandi. Boshqarma oilalarni pul, yoqilg‘i, isitish uskunalari va issiq kiyim bilan ta’minlashni boshlagan. “Tolibon” ayollarning tashkilotlarda ishlashini taqiqlagani oqibatida gumanitar yordam yetkazib berishda qiyinchiliklar kuzatilmoqda.
Izoh (0)