Peru hukumati norozilik namoyishlari tufayli 15-yanvardan boshlab mamlakatning ayrim hududlarida, jumladan, poytaxt Limada ham favqulodda holat e’lon qildi, deb yozadi LaRepublica gazetasi. Maxsus rejim 30 kunga joriy etildi.
“2023-yilning 15-yanvaridan boshlab Puno, Kusko, Lima, Kalyao hududlarida, Apurimak hududining Andauaylas provinsiyasida, Madre-de-Dios hududining Tambopata va Taxuamanu provinsiyalarida, shuningdek, Mokegua hududining Mariskal-Neto provinsiyasidagi Torata shahrida 30 kalendar kun muddatga favqulodda holat e’lon qilinsin”, — deyiladi farmonda.
Ichki tartib Peru milliy politsiyasi va Qurolli kuchlar tomonidan ta’minlanadi.
Farmon beshta avtomagistralni, jumladan, Janubiy va Shimoliy Pan-Amerika magistrallarini ham qamrab oladi. Bundan tashqari, Puno shahri aholisiga soat 20:00 dan 04:00 gacha uylarini tark etish taqiqlanadi. Taqiq o‘n kun davomida amal qiladi.
Perudagi norozilik namoyishlari dekabr oyining birinchi yarmida, o‘sha paytdagi prezident Pedro Kastilyo uni korrupsiya ayblovlari tufayli ishdan bo‘shatmoqchi bo‘lgan parlament yig‘ilishi oldidan Kongressni tarqatib yuborgani va favqulodda holat e’lon qilganidan keyin boshlangan. Shunga qaramay, deputatlar davlat rahbariga impichment e’lon qilishdi. Keyinchalik Kastilyo isyonda ayblanib, hibsga olingan va 18 oyga qamalgan.
Davlat rahbari lavozimini vitse-prezident Dina Boluarte egalladi. U 2024-yilda muddatidan oldin saylovlar o‘tkazish hamda konstitutsiyaviy islohotlarni taklif qildi. Ammo uni hamma ham qo‘llab-quvvatlamadi.
Yanvar oyida mamlakatda Boluarte, bosh vazir Alberto Otarola, ichki ishlar vazirlari Viktor Roxas va mudofaa vaziri Xorxe Chavesga nisbatan tergov boshlandi. Ular namoyishchilarning o‘limi tufayli genotsidda ayblanmoqda. La Republica qayd etishicha, mitinglar qurbonlarining umumiy soni 40 nafarga yaqinlashgan.
Izoh (0)