Россиянинг Украинага 14 январь кунги оммавий ҳужуми вақтида Днепр шаҳридаги тўққиз қаватли турар жой биносига ракета келиб тушди. Оқибатда, сўнгги маълумотларга кўра, 20 киши ҳалок бўлди. Бу ҳақда Днепропетровск вилояти маъмурияти раҳбари Валентин Резниченко маълум қилди.
Яна 73 киши, жумладан, 14 бола жароҳатланган, дейди Днепропетровск вилоят кенгаши раҳбари Николай Лукашук. 40 дан ортиқ киши касалхонага ётқизилган, тўрт нафари оғир реанимацияда.
«Қутқарув операцияси давом этмоқда. 40 дан ортиқ одамнинг тақдири номаълумлигича қолмоқда», — деб ёзди Резниченко Telegram’да.
Днепрдаги турар жой биносига ракета ҳужуми оқибатида 72 хонадон вайрон бўлган, 230 дан ортиғи зарар кўрган. Вилоят ҳокимлиги раҳбарининг сўзларига кўра, ўт ўчирувчилар бир нечта ёнғинларни ўчиришда давом этмоқда.
14 январь куни тушдан кейин Россия Украинага қарши навбатдаги оммавий зарбаларни берди. Днепрда тўққиз қаватли бинога ракета урилиши оқибатда иккинчи қаватдан тўққизинчи қаватгача бўлган иккита подъезд вайрон бўлган.
Изоҳ (0)