Buyuk Britaniya bosh vaziri Rishi Sunak Eron hukumatining mudofaa vaziri sobiq o‘rinbosari Ali-Rizo Akbariyni qatl qilish haqidagi qarorini qoraladi. U Britaniya fuqaroligiga ega edi, Eron hukumati uni MI6 foydasiga josuslik qilishda ayblagandi.
“Men Britaniya-Eron fuqarosi Ali-Rizo Akbariyning Eronda qatl qilinganidan larzaga keldim. Bu o‘z xalqining inson huquqlarini hurmat qilmaydigan yovvoyi va vahshiy rejim tomonidan qilingan shafqatsiz va nomardlarcha harakat bo‘ldi”, — deb yozdi Sunak o‘z Twitter’ida.
2000—2008-yillarda Eron mudofaa vaziri o‘rinbosari lavozimida ishlagan Ali-Rizo Akbariy osib o‘ldirildi. Britaniya fuqaroligi bo‘lgan sobiq amaldor Eron hukumati tomonidan 2019-yilda hibsga olingan, shundan keyin unga Buyuk Britaniya TIV MI6 foydasiga josuslik qilish ayblovi qo‘yilgan edi.
Uning o‘zi aytib berishicha, u o‘n oy davomida qiynoqqa solingan va kamera qarshisida o‘zi sodir etmagan jinoyatlarga iqror bo‘lishga majburlangan. Buyuk Britaniya tashqi ishlar vaziri Jeyms Kleverli hukmni “siyosiy maqsadga ega” deb atab, eronlik mansabdorni ozod etishga chaqirgan edi.
Mavzuga doir:
Izoh (0)