Birlashgan Millatlar Tashkiloti ma’lumotlariga ko‘ra, keng ko‘lamli bosqin boshlanganidan beri 18 096 nafar ukrainalik tinch aholi jabr ko‘rdi. Shu jumladan, 6 952 kishi halok bo‘lgan, yana 11 144 kishi jarohatlangan. Bu haqda BMT Bosh kotibi o‘rinbosari Rozmari Dikarlo Ukrainadagi inqirozga bag‘ishlangan Xavfsizlik kengashi yig‘ilishida so‘zlagan nutqida aytdi.
Dikarloning so‘zlariga ko‘ra, birgina Baxmutda dekabr oyi boshidan buyon kuchaygan jangovar harakatlar oqibatida 22 nafar tinch aholi halok bo‘lgan, yana 72 nafari yaralangan.
Shu bilan birga, u asl ko‘rsatkichlar bundan ancha yuqori bo‘lishi mumkinligini ta’kidladi.
Dikarlo urush Ukrainaga katta zarar yetkazganini ta’kidladi. Uning so‘zlariga ko‘ra, Rossiya bosqini 7,9 million ukrainalikni vatanni tark etib, qo‘shni Yevropa mamlakatlariga ko‘chib o‘tishga majbur qilgan. Yana 5,91 million kishi mamlakat ichida ko‘chirilgan.
Shu bilan birga, fuqarolik infratuzilmasi obyektlariga tizimli hujumlar vaziyatni yanada kuchaytirib, tobora ko‘proq odamlarni o‘z uyini tark etishga majbur qilmoqda.
Shuningdek, BMT Ukrainada tibbiyot muassasalariga 745 ta hujum uyushtirilgani haqida ma’lumotlarga ega, bu esa dunyodagi eng yuqori ko‘rsatkichdir. Donetsk, Zaporojye, Nikolayev va Xarkov viloyatlarida barcha tibbiyot muassasalarining 50 foizigacha qisman yoki to‘liq ishlamayapti.
Dikraloning so‘zlariga ko‘ra, ukrainaliklar qishki bayramlarning ko‘p qismini Rossiya o‘qlaridan yashiringan holda bombapanohlar va yerto‘lalarda o‘tkazdi. Otishma hatto diniy Rojdestvo bayramida ham davom etdi.
Izoh (0)