Фарғона вилоятида психотроп дори воситаларининг ноқонуний савдосига чек қўйилди. Бу ҳақда Ички ишлар вазирлиги хабар қилди.
Қайд этилишича, гиёҳвандлик ва психотроп моддаларнинг ноқонуний муомаласига қарши курашиш бошқармаси ходимлари мурожаатга асосан тезкор тадбир ўтказган. Унда 2022 йил декабрь ойида Фарғона вилоятида яшовчи фуқаролар Қирғизистон билан чегара ҳудудидаги вилоятлар орқали кўп миқдордаги психотроп дори воситаларининг контрабандаси билан шуғулланаётгани аниқланган.
Тадбир давомида 1990, 1971, 1998 йилларда туғилган фуқаролар ишга жалб қилинган харидорга 30 200 дона «Зардекс» дори воситаларини сотаётган вақтида ашёвий далиллар билан қўлга олинган.
Суриштирув жараёнида 1990 йилда туғилган шахс қалбаки дори воситаларини Наманган вилоятининг Қирғизистон билан чегара ҳудидидан олиб ўтгани, сўнгра 1971 йилда туғилган жиноий шеригининг Данғара туманидаги яшаш уйига олиб келиб, сақлагани маълум бўлган.
Тадбирда қорабозордаги умумий нархи 1 миллиард 208 миллион сўм бўлган психотроп воситаларнинг савдосига чек қўйилган.
Ҳозирда тезкор суриштирув ишлари олиб борилмоқда.
Изоҳ (0)