Rossiyaning Penza viloyatida koronavirus omikron shtammining “kraken” deb nomlangan subvarianti — XBB.1.5 bilan kasallanish bo‘yicha birinchi holat qayd etildi. Bu haqda “Rospotrebnadzor” (Rossiya Iste’molchilar huquqlarini himoya qilish va inson farovonligini nazorat qilish federal xizmati) ma’lum qildi.
“Kraken”ga chalinish holati SARS-CoV-2 genomlari ketma-ketligi bo‘yicha ma’lumotlar monitoringi doirasida qayd etilgan, deyiladi xabarda. Muassasa Rossiyada omikron shtammining ko‘plab turlari mavjudligini, ammo BA.5 subvarianti dominant bo‘lib qolayotganini ta’kidladi.
“Kraken” koronavirusning yangi subvarianti. Ma’lumotlarga ko‘ra, u juda yuqumli, ammo kasallikning kechishi yengil deb baholanmoqda.
Jahon sog‘liqni saqlash tashkiloti XBB.1.5 subvarianti kovid bilan kasallanishlar ko‘payishiga olib kelishi mumkin, deb hisoblamoqda. “O‘zining genetik xususiyatlari va tez tarqalishidan kelib chiqib, XBB.1.5 kasallanishlar soni oshishiga hissa qo‘shishi mumkin”, — deb ta’kidlagan JSST yanvar oyi boshida, asosan, Qo‘shma Shtatlardan olingan ma’lumotlarga asoslanib.
Izoh (0)