Filippin prezidenti Ferdinand Markos iyundan buyon Ukrainaning prezident Zelenskiy bilan telefon suhbatini tashkillashtirish bo‘yicha barcha iltimoslarini e’tiborsiz qoldirmoqda. Bu haqda Malayziya masalalari bo‘yicha ishonchli vakil Denis Mixaylyuk ma’lum qildi, u Filippin bilan munosabatlar uchun ham mas’uldir, deb xabar bermoqda Inquirer.
Diplomatning so‘zlariga ko‘ra, Kiyev telefon orqali suhbatlashib, Manilaning Rossiya-Ukraina urushi yuzasidan pozitsiyani aniqlashtirib olishga umid qilgan.
Markos o‘tgan yilning 30-iyunida Filippin prezidenti lavozimiga kirishgandi. Saylov kampaniyasi chog‘ida u nizoda tomonlardan hech birini qo‘llab-quvvatlamoqchi emasligini aytgandi. Qurolli to‘qnashuvning o‘zini esa u nomaqbul deb atagandi.
“Bongbong” laqabli 64 yoshli kichik Markos may oyida bo‘lib o‘tgan saylovda 31 milliondan ortiq saylovchi bilan ko‘pchilik ovozlarni qo‘lga kiritgan edi. U o‘z siyosatining ustuvor yo‘nalishlari sifatida pandemiyadan keyin respublikani tiklash va filippinliklarning hayot sifatini yaxshilashni belgilagan.
Davlatning yangi rahbari, Filippinni 1965-yildan 1986-yilgacha boshqargan diktator Ferdinand Markosning o‘g‘li. Uning otasi Ferdinand Markos hukumatdan ag‘darilgan va surgunda vafot etgan.
Ayrim siyosiy tahlilchilar va huquq himoyachilarining fikricha, yangi prezident o‘zidan oldingi prezidentdan ham qattiqroq avtoritar yo‘l tutadi.
Kichik Ferdinand Markos 1986-yilda Filippindagi harbiy to‘ntarishdan so‘ng ota-onasi bilan mamlakatni tark etgan, biroq 1991-yilda qaytib kelgan va uzoq yillar davomida mamlakat Kongressi a’zosi bo‘lgan. U avvalroq otasi haqida ijobiy fikrlarni bildirib, uni “ajoyib” davlat arbobi deb atagan edi.
Izoh (0)