Sholsning Ukrainaga tanklar yuborish bo‘yicha pozitsiyasi Baydenning xatti-harakatlariga bog‘liq — Politico

Germaniya kansleri Olaf Shols Ukrainaga tanklar yetkazib berish masalasida AQSH prezidenti Jo Baydenning pozitsiyasidan kelib chiqadi. Bu haqda Politico nashri Germaniyadagi manbalariga tayanib yozmoqda. Avvalroq ikki mamlakat yetakchilari jangovar piyoda mashinalarini yuborish bo‘yicha o‘z qadamlarini muvofiqlashtirib olgan edi.

Shols shu hafta Berlindagi hududiy saylovoldi mitingda Leopard tanklarini yetkazib berish “do‘stlar va ittifoqdoshlar, ayniqsa, bizning transatlantik sherigimiz, AQSH bilan” muhokama qilinishi kerak, degan edi. Politico qayd etishicha, kanslerga Londonning Kiyevga o‘zining Challenger 2 tanklarini yuborish qarori bosim o‘tkazmoqda — Buyuk Britaniya Ukrainaga G‘arbda ishlab chiqarilgan tanklarni beradigan birinchi mamlakatga aylanishi mumkin. Bundan tashqari, Polsha Ukrainaga Germaniyada ishlab chiqarilgan tanklarni yetkazib berishini e’lon qilib bo‘ldi.

Kanslerning vakili avvalroq Buyuk Britaniyaning rejalari Germaniya pozitsiyasini o‘zgartirmasligini aytgandi. Shols Leopard tanklarini yuborish masalasini hal qilishda Germaniya yolg‘iz harakat qilmasligi kerakligini ko‘p bora ta’kidlagan.

Pentagon Ukrainaga Amerikada ishlab chiqarilgan Abrams tanklarini yubormasligini aytib, buni ular ko‘p yonilg‘i sarflashi va ulardan foydalanish qiyinligi bilan izohlagandi. Bundan tashqari, AQSH ular tomonidan yetkazib berilayotgan Bradley piyoda jangovar mashinalari — “tanklar qotillari” ekanini aytgandi.

Bu tanklar ko‘plab mamlakatlarda, xususan, Ispaniya, Polsha, Gretsiya, Daniya va Finlyandiyada ham bor. Ammo ularni Myunxendagi Krauss-Maffei Wegmann kompaniyasi ishlab chiqaradi, shu sababli ularni Ukrainaga yetkazib berish uchun ishlab chiqaruvchi mamlakatning reeksport uchun ruxsati kerak, shu munosabat bilan hozir “xalqaro bosim Berlinga qaratilgan”, deb yozgandi Politico.